ORANJESTAD – Como reaccion riba un articulo den Bon Dia Aruba di 6 di maart ultimo, redaccion a ricibi un reaccion verbal di sra. Trudy Hassell, hefe di GNC.
Den e relato aki sra. Hassell ta desmenti cu tin caso di mal trato di e presonan bao di su custodia y por cierto a duna oportunidad na prensa pa bishita e instalacionnan di su departamento, pa por observa pa nan mes den ki estado e lugar ta. Tambe el a elabora riba e tema di alimentacion cu e detenidonan ta haya, cu ta consisti di dos cuminda di pan y un di catering. Tambe ta duna tratamento medico debido na esnan cu mester di esaki, inclusive cuminda di dieta den caso cu nan tratamento ta rekeri esaki. E gastonan pa persona ta varia entre 275 – 350 florin dependiendo di e eventual gasto medico, manera menciona.
Pa loke ta e personanan cu a pidi asilo politico y ta den tramite pa esaki, GNC ta atende nan den esaki y ta percura pa e comunicacion cu e comision cu ta encarga cu maneho di e casonan aki. Sra. Hassell a menciona tambe cu tabatin caso cu ainda no a ser scucha pa e comision. Tin tambe ocasion pa bishita den oranan di atardi; tin na caminda tambe bishita mainta, pero mester tene cuenta cu diferente persona mester bay por ehemplo dilanti hues comisario mainta, y ta trahando ainda riba esaki.
