Hefe di Parlamento di Venezuela, Juan Guaidó, lider opositor reconoci como presidente interino na 50 pais, ta un di oradornan anuncia pa e foro Concordia di New York, paralelo pa Asamblea General di ONU, den cual ta anticipa cu presidente Nicolás Maduro lo interveni.
E foro, cu lo tuma luga dia 23 y 24 di september, a anuncia diahuebs pasa cu ademas di Guaidó, tambe lo conta cu e presencia di David Smolansky, co-fundado di e partido Voluntad Popular y coordinador di Organisacion di Estadonan Americano pa e crisis di migrante y refugiado Venezolano, y tambe e activista opositor, Lilián Tintori.
Aunke Concordia no ta ofrece detayenan riba nan ponencia, e participacion di e opositornan na e foro ta ser mira como un contra- programacion adelanta di e discurso cu Maduro lo ofrece na Asamblea General.
Segun informacion provisional di ONU, ta planea cu Maduro lo interveni den Asamblea General dia 26 di september proximo, den oranan di atardi.
Diaranson pasa, Guaidó a afirma den un entrevista cu lo mantene su mes como hefe di Estado interino te ora cu ‘por logra un eleccion’ y aunke na 2020 no lo t’ey mas como lider di e Legislativo.
Asina mes, el a bisa cu ta traha pa Venezuela ‘haya un transicion pacifico’ di poder cu e participacion ‘di tur sector’, meymey di e crisis politico economico grave cu a hiba alrededor di 4 miyon di persona pa sali for di nan pais den ultimo añanan, segun cifra di ONU.
