Un dia nos tata a trece un caha di carton cu yen buraco chikito cas. Ora el a habri e caha nos wowonan a bira grandi di asombro, ami a kere cu ta un cacho chikito tin aden pero e no tabata niun cacho of pushi sino un tipo di parha. Su piek tabata mes grandi cu su cara, casi e no tabatin pluma pero un lana blanco y fini. Su cuero tabata ros. M’a haya hopi duele keriendo cu un hende lo a ranca tur su pluma y mi wowonan a yena cu awa. Mi tata a puntra mi ‘dicon bo ta yora?’ y el a bisa mi cu e ta un wakamaya baby y cu su plumanan no a sali ainda.

Despues di un par di siman, berdad e plumanan berde bunita a cuminsa sali. Mi tabata kere cu e berde lo cambia di color dia e bira mas grandi mescos cu fruta, pero esey nunca a pasa. Despues mi a bin lesa den un buki di wakamaya cu tin primordialmente tres color y esun berde yama Ara Militaris.

Mi tata a puntra nos con nos ta bay yamele, ami a bin cu e nomber Guaco – e tempo ey e nomber Guaco tabata conoci como un banda musical masha popular for di Venezuela. Mi rumannan a gusta e nomber y Guaco tabata move su cabes di contento. Cu tempo el a cuminza ripiti algun palabra cu mi mama cu hopi pasenshi tabata bis’e pa e ripiti. Guaco tabata hopi inteligente, pasobra ora mi mama bisa “Uno” e tabata bisa “dos…tres…cuatro”. Mas tempo a pasa e tabata siña mas palabra, te hasta e tabata sa di yama nos nombernan (door cu mi mama tabata yama nos cu tabata hunga pafo pa nos bin come, dus manera mi mama bisa mi nomber, Guaco tabata bisa tur otro nomber den ordo). E tabata sa canta tambe e himno di Venezuela y di Aruba pasobra e tabata scucha tur 6or atardi for di television, e tempo ey ta RCTV y TeleAruba so tabatin pa wak.

Tambe manera e tende e auto di mi tata start e ta cuminsa yama nos nomber y tras di esey e tabata bisa ‘boso pura’, custumber cu mi tata tabata hiba nos scol mainta y Guaco a djis siña bisa loke e tabata bisa ora e start e auto.

Tur aña durante Pasco nos tabata treat Guaco nootnan di Pasco y e tabata gusta masha hopi. Un biaha mi ruman a bay dun’e un casca bashi di noot cu el a pega back cu lijm. Guaco a gewoon tir’e cu e noot y cuminsa grita den su lenguahe pasobra nos no a compronde nada di kico e tabata bisa.

Mainta trempan e tabata lanta y mi tata tabata dun’e un tiki pan muha den koffie y esey e tabata gusta masha hopi. Nos sa ora e gusta algo pasobra di biaha e ta bay na e bara y dal varios koprol, y ora kier bo carici’e e ta saca su cabes pafor di e haula y e ta move su cabes ariba abao; si e no haci esey e tin chens di morde bo manera el a haci cu un amigo di cas.

E tabata cana den cura y hasta e cachonan tabatin miedo di dje, nan ta hala leu di dje. Un biaha un pushi kier a bringa cu Guaco, nos a djis tende un yoramento mahos, ora nos a yega nos a mira sanger na e rand di e haula. Di biaha nos a core wak si Guaco tabata bon y nos a wak cu asombro un pida tenchi di pushi cu e huña pega na dje benta na e skina di e haula. For di e dia ey niun pushi a pasa cerca mas.

Tabatin si un momento cu Guaco a haya miedo. Tabata e dia cu un bisiña su macaco, cu tabata un size di un mucha di 6 aña, a dal un huida y pasa cerca nos. Nos a tende na radio cu e bisiña tabata buscando su macaco cu tabata perdi. Guaco a cuminsa grita masha duro mes, bula di un banda pa otro, y e macaco tabata trankilamente comiendo tur su pindanan. Nos conoce e bisiña pasobra nos sa di e macaco, mi ruman a bay busca e bisiña pa e bin busca su macaco. Ora nos a bay trankilisa Guaco y pone cuminda y awa fresco, nos no por a kere cuanto e bestia a yena e haula, nos mester a haci esey limpi tambe.

Mi ruman tabata esun cu mas a pega cune pasobra ora e tabata toca guitara. Guaco tabata baila of te hasta canta hunto cune. Mi ruman tabata sak’e for di e haula pa e por dal un bula y semper bula back cas mesora. Mas leu cu e por a bay ta riba e palo di Flamboyan di e bisiña dilanti, djey e ta bin back cas.

Guaco a biba dushi cu nos pa largo, pero no suficientemente largo, e tabata parti di famia y e sa bishita mi den mi soño.