A dura mas di un aña pa autoridadnan Ecuatoriano cuminsa e operativo cu entre 1 y 4 di juli, a logra tuma control bek di e mina di oro na e sero di La Joroba, den e poblacion di La Merced Buenos Aires provincia di Imbabura, nort di Ecuador.
E sero ey, desde fin di 2017 a ser tuma pa minero ilegal, migrantenan di e mesun pais y di exterior, tambe pa gruponan arma cu a instala den e sero un infrastructura costoso pa saca y procesa eynan e oro, cu despues lo hiba pa Colombia y Peru.
“Tabata paga entre 30.000 y 40.000 dollar den soborno pa cada truck”, un persona cu tin relacion cu e tema a bisa. E placa ey tabata pa varios persona den e trayecto di e trucknan.
La Merced di Buenos Aires ta un pueblo rural chikito, localisa 20 kilometer di e frontera cu Colombia. Su habitantenan tabata dedica specialmente pa labor agricola y ganadero, nan no tabata supera e cantidad di 1.800 persona, pero nan tereno a ser invadi pa te hasta 10.000 persona motiva pa e ‘keintura di oro’.
Manera ta sucede na tur pais unda e mineria legal ta traha, tambe alrededor di dje a desaroya hopi delito, manera labamento di placa, trata di persona, trabou infantil, prostitucion, contrabanda di combustibel, arma di candela y explosivo, extorsion y ahusticiamiento.
Entre aña 2018 y 2019, segun Minister di Interior, na La Merced di Buenos Aires autoridadnan a descubri 92 organisacion di delito, a detene 859 persona, a confisca mas di 3.400 tonelada di material mineral y 350 auto, mediante 325 operativo. Sinembargo, e huesnan local a laga den libertad mayoria di personanan deteni, pa motibo cu e prueba di e delito, cu tabata e trucknan, a scapa mayoria di biaha.
