Durante bishita di Secretario di Estado di Hulanda Alexandra van Huffelen na Aruba, por a tuma nota diferente encuentro y reunion cu tabata riba agenda. Despues di un introduccion cortico, e organisacion SECA [Stichting End Child Abuse] a papia cu Van Huffelen durante un evento na Centro di Bario Dakota unda otro instancianan tambe tabata presente manera Fundacion pa Nos Muchanan y Hungateca.
Mitchell Ho-Asjoe, presidente di SECA ta conta Bon Dia cu e encuentro a dura ongeveer dos ora, cu diferente mesa na unda institutonan y diferente organisacionnan a bini hunto pa topa cu e secretario di estado. Di e forma aki van Huffelen tabata por a saca afo un poco mas di e preocupacionnan, ideanan y deseonan cu tur instancia y organisacion a trece dilanti. Por a siña mas for di e otro organisacionnan sinta na mesa manera Fundacion pa Nos Muchanan y Hungateca. E tabata un encuentro cortico y poco informal, na unda tur hende por a comparti cartanan, documentonan, manifiestonan y mas pa e Bureau di VNO bay wak nan y check cu nan.
“Nos a manda mail pa VNO caba pa meneer Michiel de Graaf cu ta e representante eynan, pa un follow-up sea cu van Huffelen ora e t’ey back of alvast cune pa nos sinta y splica e situacion mas detaya cu awor nos a bin toca na e departamento aki cu ta representa Hulanda na Aruba,” segun sr. Ho-Asjoe. E grupo ta gradici pa e audiencia pa por a comunica cu secretario di estado riba problematica di abuso di mucha y lo keda den contacto cu VNO pa por haci un reunion mas personal cu palabracionnan mas estrecho riba diferente punto crucial.
Sra. Van Huffelen, segun Sr. Ho-Asjoe ta splica Bon Dia, ta mustra hopi habri y amabel, e ta compronde hopi cos. E feedback cu nan a haya ta cu e kier echt sinti kico bo ta pensa como organisacion, y cu e tin e intencion pa bay haci algo cu esaki. Loke a resalta ta con alegre y como e ta carga su mes manera un ser humano. E meta di e grupo ta keda constante, como mision di e fundacion tambe ta pa sigui bringa pa nan derecho y drecha situacion pa muchanan cu ta wordo abusa. “Nos ta keda trece dilanti e situacion pa sikiera pone un tiki presion na esunnan cu tin cu move cosnan, nan ta moviendo si pero den manera di ‘smokescreen’ cu no ta resolve realmente problema pero ta mustra bon den media.”
E punto principal ta pa tin un cita cara-a-cara entre Van Huffelen y e organisacion, tambe mirando con por sigui na colabora cu otro organisacionnan. Sr. Ho-Asjoe: “Nos mision ta hopi diferente, otronan cu ta bezig ta yuda mucha cual ta hopi zuiver, pero loke nos ta haciendo ta pa proteha victimanan, persigui pedofielnan y yuda den haci denuncia. Ora cu hende pega cu otro instancia ta cerca nos nan ta bin bati na porta. Nos mision cu nos fundacion y otro fundacionnan ta algo hopi diferente ya cu nan no ta anda cu e ‘acute gevallen.’
