Ayera tabata un atardi di manifestacionnan. Tres marcha di protesta a tuma luga y nan a wordo convoca casi den e mesun ora. Un di nan tabata esun di e grupo Nos Kier Husticia cu a wordo concentra riba Plaza Padu Lampe. Tabata bisto e presencia di hopi polis.

Aunke e grupo aki no tabatin di haci directamente cu e otro dos manifestacion contra abuso di menor, si indirectamente tabatin di haci cu e mesun keho di falta di husticia na Aruba pa castiga severamente cierto delitonan, entre nan corupcion.

Lucha contra corupcion

E grupo Nos Kier Husticia, representa entre otronan pa Sr. Jeffrey Schuilenbrug y Sr. Tony Sneek a entrega un manifiesto na oficina di Gabinete di Gobernador di Aruba. Pero e mesun manifiesto aki a wordo entrega na e sede di Representacion Hulandes na Aruba (VNO). Den e carta aki nan ta protesta contra e trabao di Ministerio Publico (OM).

E grupo aki cu recientemente a tene un reunion cu Minister di Husticia, Andin Bikker, ta haya cu OM no ta tene cuenta debidamente cu e denuncianan di corupcion. Tampoco nan no ta bin cu resultadonan cla riba investigacion y entrada hudicial cu a wordo haci, ya cu niun hende sa con a para cu nan.

“Mas inval, masha bon, pero duna mi resultado tambe,” Sr. Schuilenburg a bisa.

E grupo a concentra riba Plaza Padu Lampe, caminda Sr. Schuilenburg a dirigi algun palabra dilanti di esnan cu a bay manifesta cu nan. E tabata un grupo no grandi conforma entre otronan pa trahadonan di gobierno.

E manifiesto tin varios punto, pero esun mas esencial tin di haci cu nan ta pidi pa Hulanda por yuda nos instancianan concerni cu tecniconan of expertonan den cifra pa nan por yuda OM pa bay tras esunnan cu a comete corupcion, estafa y cu a ‘horta e pais Aruba’, segun Sr. Schuilenbrug.

El a agrega cu nan ta condenan tur acto di corupcion contra fondo publico, y esaki ta e berdadero esencia di e manifiesto. Pues nan no ta di acuerdo con OM ta investiga e casonan di corupcion na Aruba. Ya cu nan ta mira diferente tipo di ‘gate’, caminda politiconan a enrikece nan mes di un manera no honesto.

Tambe nan ta condena e castigo abao cu ta wordo duna riba casonan relaciona cu abuso di mucha. Nan ta contento cu Parlamento a hisa e castigo, pero ta keda e pregunta si hues ta bin cu straf mas halto, y esey nan tin cu wak ainda.

E grupo aki ta mira cu nos departamentonan a haci nan trabao, y tambe Parlamento, ya cu tin parlamentarionan cu a yega di entrega documentonan na OM, pero nan ta mira cu e instancia aki a ‘’keda drumi’. Nan no por splica kico ta pasando den nos sistema hudicial ya cu nan ta haya cu masha caso di corupcion ta wordo cometi na Aruba, pero nunca a haya atencion di Hulanda. Pero ora cu Hulanda ta duna placa, nan kier bin cu cantidad di exigencia.

Sr. Schuilenburg a bisa cu e hecho aki ta duel’e masha hopi, pasobra mientras departamentonan di gobierno y institutonan di pais Aruba ta wordo neglisha of ignora pa OM, pero si ora un miembro di Tweede Kamer na Hulanda ta grita algo, eynan di biaha OM ta cuminsa traha na Aruba.

Na salida for di VNO, Sr. Schuilenburg a expresa su satisfaccion, ya cu e ta sinti cu eynan si nan a wordo scucha manera deber ser. Nan tabatin tempo pa expresa nan preocupacion. “Nan a scucha nos y nan a garantisa nos cu e carta aki ta bay yega si ta posibel awe mes na ministerio di Asunto Interno di Hulanda,” el a bisa.

Di otro banda, Sr. Schuilenburg a laga sa cu e hecho cu tabatin otro manifestacion mas, esaki a trece cierto confusion. Ya cu kisas tabatin algun di nan cu tabata preocupacion cu e casonan di corupcion, y nan a bay den otro manifestacion y vice versa. Ya cu tabatin den nan manifestacion algun hende bisti na preto cu a kere cu esaki tabata esun contra abuso di menor.

Pero na final e tabata contento cu pueblo di Aruba a lanta contra cualkier inhusticia. Ademas e grupo aki a bay sostene e manifestacionnan cu ta contra e pedofilia dilanti Parlamento.

No RST

Otro representante di e grupo aki tabata Sr. Tony Sneek kende tabata bisti un mask cu e leyenda “No RFT” pa expresa su disgusto contra e condicion cu Hulanda a bin cune pa institui un regimen di supervision financiero den forma di Rijks Financieel Toezicht pa Aruba.

Igualmente el a laga sa cu nan luchando no ta contra gobierno ni parlamento di Aruba, pero si contra e sistema Hulandes di leynan cu nos tin. Igualmente el a bisa cu casonan di corupcion grandi di miyones manera Hospital-Gate ta wordo neglisha y no ta wordo investiga pa OM. Mientras cu un ‘macamba yama Bosman ta grita riba Serlimar-Gate, y diripiente e siman aki ya nan a cuminsa haci inval’, segun Sr. Sneek.