E grupo Nos Kier Husticia bao liderazgo di Sr. Jeffrey Schuilenburg a yega di entrega dos manifiesto, un na oficina di Gabinete di Gobernador di Aruba y otro na sede di Representacion Hulandes na Aruba (VNO), diabierna atardi.
E contenido di e carta aki ta expresa nan mal contento contra e trabao di Ministerio Publico (OM) na Aruba y tambe contra nos sistema hudicial. Sinembargo nan a laga sa cu e grupo ta contento cu e anuncio cu minister di Husticia, Andin Bikker a haci cu dia 1 di september lo asumi tanto un Procurador General como un Fiscal Mayor nobo.
E ta kere cu e manifestacion di dia 10 di juni a yuda pa sacudi Hulanda. Pasobra despues di e fecha ey diripiente, despues di dos aña, Aruba a haya un PG. Pero tambe cu leynan a wordo cambia pa castigonan mas halto contra esunnan cu ta abusa contra menor di edad. “Hopi cos a sucede den corto tempo. Algo mester a lanta nan for di soño cu awor nos ta un step mas leu,” Sr. Schuilenburg a declara.
Despues di e reunion cu grupo Nos Kier Husticia a sostene cu e mandatario di husticia diamars ultimo, el a bisa cu den nan combersacion e minister tabata full di acuerdo cu nan. Nan ta haya cu e minister en cuestion a haci su parti, locual nan ta elogia for di dje. E dia ey e grupo no tabatin mucho claridad tocante un PG nobo. Pero awor practicamente a bira oficial, ya cu nan por a scuch’e for di e minister mes. “El a sigura nos cu dia 1 di september lo instala un PG,” el a bisa
Igualmente el a referi riba e manifestacion cu nan a organisa. Den comunidad a wordo cuestiona e hecho dicon a wordo duna permiso pa mas manifestacion riba e mesun dia y casi riba e mesun ora. Tabatin e manifestacion contra abuso di mucha y di otro banda, un protesta contra falta di husticia na Aruba pa castiga severamente cierto delitonan, entre nan corupcion contra fondo publico cu e grupo Nos Kier Husticia a organisa.
Sr. Schuilenburg a laga sa cu dia 19 di juni, el a haci entrega di un peticion pa permiso pa realisa e protesta aki. Pero ya mucho nan no por wordo haci, ya cu e ta bira dificil pa pospone un permiso. Eynan e confusion a bin cu tabatin mas marcha di protesta cu a wordo concentra casi den e mesun ora.
Sr. Schuilenburg a reconoce cu e situacion aki a bira un poco confuso. Pero di otro banda nan ta contento cu den un dia pueblo di Aruba a lanta contra cualkier inhusticia. Un di nan contra e problema di pedofilia a bira un preocupacion grandi den comunidad. P’esey nan di e grupo Nos Kier Husticia na final di nan protesta a bay sostene e otro marcha contra abuso di menor tambe.
