Un grupo di medico y enfermero a yega diadomingo ultimo na Aruba pa duna sosten na Hospital Dr. Horacio Oduber (HOH). Ta trata di personal medico cu tin training special pa traha den Unidad di Cuido Intensivo (ICU).
Esaki segun informacion den portal noticiero aruba.nu.
Diabierna ultimo, HOH mester a stop cu cuido electivo pa motibo di e fluho grandi di pashent di coronavirus. E siman prome ya tabatin pashent cu tabatin mester di cuido intensivo y mester a manda nan Colombia pa esaki.
Minister demisionario di Salud, Dangui Oduber a solicita cerca secretario di Estado Hulandes, Paul Blokhuis pa su mediacion den e solicitud pa manda personal medico di Aspen Medical Internacional, un organisacion di empleo pa personal medico. A dura un tempo largo pa por honra e peticion, pero Aruba awo a haya mannan extra pa duna cuido.
Tiki despues di e brote di coronavirus aña pasa ya tabatin un team medico adicional cu a bin acerca, pero den esakinan tin varios cu a resulta contagia cu Covid na momento di nan yegada, y henter e team mester a bandona e isla mesora. E tempo aya a dura algun siman pa por haya un reemplaso pa e personal aki.
