Pa di tres aña caba, e grupo conoci di Facebook como “Mi Mami” a organisa su ‘Christmas Toy Drive’ pa recauda co’i hunga pa muchanan cu tin mas necesidad den comunidad.

Asina a duna di conoce Rachel Murray, presidente di “Mi Mami”, ken a bisa cu ayera dia 20 di december e actividad a tuma luga dilanti di Cas di Cultura.

Manera ta conoci, e grupo aki ta aporta na e causa aki na unda personanan ta trece nan co’i hunga uza of nobo den bon condicion, pa asina nan por duna bek pa muchanan di menos recurso.

Murray a splica cu aña pasa nan a logra acumula mas di 1.500 co’i hunga cu a keda duna na casi 900 mucha di tur districto di Aruba “esaki tabata un trabou grandioso, pero vale la pena”, Murray a sigura.

Pa loke ta trata e aña aki, el a bisa cu nan ta hacie di e mesun manera, pero siguiendo tur e protocol sanitario cu Departamento di Salud DVG a impone. E actividad a consisti di un ‘Toy Drive’ unda e personanan ta yega dilanti di Cas di Cultura cu nan auto y laga e co’i hunga sin necesidad di baha for di nan auto.

“Nos mes ta yega na e auto y recoge e co’i hunga, pa prepara nan y haci nan nan limpi” Murray a declara.

Di esaki el a bisa cu nan ta envolve tur e coy di hunga cu papel celofan, pa asina nan por mira cu mas facilidad di ki tipo di co’i hunga ta trata y ta mas facil pa identifica y duna pa e mucha. E preparacion di esaki a tuma luga na ATIA segun loke Murray a specifica, nan tin un grupo di por lo menos 20 persona cu a yuda prepara e co’inan di hunga y por duna pa e muchanan prome cu Pasco.

“Nos kier pa tur mucha por habri un regalo e Pasco aki y mirando e situacion actual mi ta sigur cu tin famianan cu no por brinda e gesto aki pa nan yiunan”, Murray a expresa.

E grupo ‘Mi Mami’ ta existi pa di tres aña caba y ta un grupo di sosten pa mamanan den comunidad cu ta brinda basicamente apoyo, consehonan necesario maternal, “nos ta siña di otro y nos tin e sosten di e grupo aki, cu ta hopi nice”, el a bisa.

Den e grupo tambe tin personanan profesional asina como tambe ta organisa tayer pero cu e aña aki nan a pone un stop pa nan diferente evento debi na situacion actual di pandemia di Covid-19. Nan a purba di haci di manera online segun loke Murray a destaca, pa gruponan chikito, na unda nan a toca diferente topiconan como depresion post-parto, charla pa loke ta trata perdida di un yiu, entre otro.

Wit Gele Kruis tambe a ofrece un charla pa con pa prepara nan mes pa un parto, asina como tambe tabatin un partera cu a wordo invita pa ofrece su experiencia, “e ta un grupo dinamico cu hopi informacion y semper mamanan por puntra di un manera anonimo, pa via cu algun di nan ta sinti berguensa”, el a sigura.

Den temporada di pandemia, grupo ‘Mi Mami’ a bin haciendo donacionnan di paña, comestibel of algun otro articulo cu algun integrante di e grupo cu ya no mester di dje mas y nan ta duna pa otro hende cu tin necesidad, “cualkier ayudo cu nan mester pa loke ta productonan esencial pa nan baby nos ta brinda esaki door di aporte di e mamanan di e grupo”, Murray a manifesta.

Pa aña 2021, Murray a trece dilanti cu nan kier pa e mamanan ta hopi mas activo y cu mas participacion den eventonan, pa motibo cu esaki ta un grupo riba Facebook y cu no ta haya contacto fisico pa wak con e mamanan ta sinti pa apoya y scucha nan , “eynan nos kier yega”.