(AP) – Tabata un discurso cu a atrae atencion manera ningun otro, promoviendo vacunacion, muchanan hoben y bienestar di e planeta, duna pa e famoso grupo Koreano, BTS.

Papiando cu e audiencia di e evento tocante bienestar di medio ambiente, e grupo di 7 miembro a aparece dilanti e muraya conoci di e General Assembly Hall riba dialuna pa yuda promove U.N su metanan pa aña 2030, incluyendo e meta di combati pobresa extremo, preservacion di e planeta y yega na igualdad di genero sexual.

“Cada decision cu nos tuma, ta e comienso di cambio, no e final,” segun RM, e grupo su lider.

President di Sur Korea, Moon Jae In a introduci e grupo como invitadonan special presidencial, y un “grupo excepcional di mucha hombernan hoben cu ta conectando cu e hubentud rond di mundo.”

E peso di e momento tabata evidente den e muscionan para dilanti e lidernan di mundo y secretario general di U.N Antonio Guterres. Nervionan tambe tabata presente, ora cu e miembro di e banda Jimin, tabata bruha cu su palabranan mientras el a papia tocante e hobennan purbando di sigui cu nan bida den e pandemia. Jimin a pidi despensa prome cu el a tuma un pausa pa por recolecta su mes. E tabata e momento cu a causa e grupo di fanaticonan “BTS ARMY” pa cuminsa demostra nan apoyo pa su persona riba di rednan social. E artistanan a tuma turno riba escenario durante nan discurso di 7 minuut.

Sinembargo, no tur cos tabata tocante e metanan di U.N. E grupo tambe a revela un video musical nobo pa nan cantica recien “Permission to Dance,” cual a ser filma na e oficina di U.N den New York. E cantantenan a enfatisa e parti di e cantica, “Don’t talk the talk, just walk the walk,” mientras bailado di e General Assembly Hall te cu e hardin.

Desde nan gran debut den aña 2013, BTS a genera un reconocimento di escala global nan musica cu ta produci pa nan mes. Recientemente, nan a crece di fama na Asia, y a cuminsa genera e mesun fama, te hasta mas ainda den Merca y varios otro pais di mundo. Ademas di genera fama pa nan musica, tambe nan a cuminsa bira un grupo ehemplar y admira pa nan activismo, bogando pa problemanan social y racial den henter mundo, cual a causa un bon impresion cu varios diferente persona kendenan a bira fanatico di e grupo.

Parti di nan activismo ta cubri varios diferente topico, manera recientemente papiando tocante racismo contra e Asiaticonan. E banda a keda den prome luga den Billboard Hot 100 3 biaha den aña 2020, y a keda nomina pa premionan di gran reputacion y balor na Merca manera Billboard Music Awards y MTV Video Music Awards.

Dialuna su discurso a marca e grupo su di dos aparencia na e U.N. E banda a tuma parti den un evento na aña 2018, unda cu e lider RM a papia tocante su trabao cu UNICEF.