Bon Dia Aruba a ricibi un relato di Grupo Isla, kende ta desea di aclaria puntonan cu ABC a trece dilanti tocante e proyecto na Isla di Oro. Aki ta sigui e relato completo.
Aruba Birdlife Conservation a emiti recientemente un comunicado di prensa den cual ta purba difama e proyecto di hotel na Isla di Oro. Grupo Isla como desaroyado di dicho proyecto ta bin dilanti inmediatamente pa contraresta e argumentonan aki cu no tin base.
Na ningun momento ta bay rosa, corta of kita ningun Mangel, ni tampoco perhudica e bida marino di e luga. Ademas cu Grupo Isla ta respeta e balor natural y historico di Isla di Oro, no lo ta algo logico pa atenta contra e atractivo principal di e proyecto. Actualmente expertonan local e internacional ta formulando programanan di restauracion y preservacion di mangel y rifnan existente, riba peticion di e desaroyadonan.
Desaroyadonan tin añanan trahando cu instancianan publico y priva di Aruba manera DIP, como tambe organisacionnan internacional manera Smith Warner International pa cumpli cu e exigencianan mara na un certificacion LEED (Leadership in Energy and Environmental Design) di e US Green Building Council. Cu esaki ta busca pa garantisa cu den e proceso di planificacion y eventual ehecucion di e proyecto, ta sigui tur recomendacion y standards di proteccion di medio ambiente y maneho sostenibel.
Despues di su reciente derota legal contra un proyecto na Palm Beach, ABC ta dirigi su agenda politico awo riba otro proyecto local, bou di e mesun modus operandis cu e caso anterior. Cu esaki ta referi na e hecho cu directiva di ABC a atende personalmente no un, pero dos reunion na 2015 y 2016, cu representantenan di Grupo Isla caminda nan a ricibi tur splicacion di con e proyecto ta planea; y principalmente con ta teniendo cuenta cu absolutamente tur aspecto ambiental y di proteccion pa e flora y fauna di e area. Na ningun momento nan a expresa algun obhecion pa cu e proyecto.
Di mesun manera Grupo Isla a reuni cu e gran mayoria, si no ta tur, organisacion pro medio ambiente na Aruba. No solamente a duna presentacion y duna tur oportunidad pa pregunta, pero tambe a invita nan pa individualmente manda nan recomendacionnan por escrito pa Grupo Isla tene cuenta tur hende su punto di bista den e formulacion di e proyecto. Esaki ta algo cu a keda haci tambe.
Proyecto Isla di Oro ta uno integral caminda ta crea un opcion atractivo den e mercado turistico pa atrae turistanan di entrada halto; ta resalta un area natural cu a bay atras dor di implementa plan di reforestacion y mantencion di mangelnan; ta desaroya un incentivo economico den Pos Chikito creando cuponan di trabou y mas entrada pa negoshinan di e area; ta mehora e condicion social y di siguridad pa e bisiñanan strobando entrada di ilegal y otro tipo di actividadnan contra ley, como tambe aliviando e molester di sangura di un manera sano pa hende, mata y bestia.
Tur esaki ta informacion cu bisiñanan di Pos Chikito a haya den mas di un ocasion. Nan a wak cu nan mesun wowo y compronde. A base di esaki, Grupo Isla tin lista cu shen y shen di firma di habitantenan di e bario cu ta aproba y apoya e proyecto. Nan ta ansioso pa e proyecto por cuminsa pa asina por eleva e bario y proteha e zona natural.
Mas leu ainda, desaroyadonan ta e prome cu ta sostene e idea pa e area di Isla di Oro forma parti di Parke Nacional Arikok ya cu nan ta dispuesto pa cumpli cu e exigencianan di preservacion cu esey ta trece cu ne. Grupo Isla kier traha hunto cu organisacionnan local pa facilita investigacion y proteccion di e bida marino y vegetal rond di dje. Programanan di educacion y conscientisacion tanto pa nos hendenan como nos bishitantenan ta un uun opcion.
Basa riba tur loke a menciona anteriormente, Grupo Isla ta considera cu esaki ta un intento di parti di ABC pa bruha tera den opinion publico. E proyecto di Isla di Oro ta conta cu apoyo di sector publico, priva y di e comunidad di Pos Chikito, hustamente pasobra di prome instante tabatin un transparencia total di informacion y danki na esaki tur partido envolvi, incluyendo e NGOs di Aruba sa cu no ta bay causa ningun daño, al contrario, ta bay rescata y proteha e mangelanan ademas di trece multiple beneficio. Apesar di e atake innecesario aki, Grupo Isla ta keda porta habri pa ABC y tur otro NGO local cu ta desea di sinta papia y traha hunto.
Tocante Grupo Isla
Grupo Isla ta forma pa un grupo di profesional altamente cualifica den Planificacion, Creacion y Ehecucion di proyectonan innovador. Nan obhetivo ta pa traha di manera responsabel y transparente den desaroyonan di excelencia. Pa mas informacion bishita www.grupoisla.net.
Tocante Isla di Oro
Zoetry Isla di Oro Aruba lo ta un di e poco centronan turistico riba awa den zona di Caribe, cu suitenan estilo exotico manera tin caba na Bora Bora. zoetry Isla di Oro Hotel & Spa lo celebra e arte di viva pa medio di experiencianan di bienestar. E compleho ta ofrece un spa magnifico manera ningun otro y ta brinda tambe paseonan educativo di e mangelnan, e rifnan di e zona y observacion di parhanan for di un toren ademas di otro actividadnan relacion cu beach y lama, ningun di nan uzando ekipo di motor. Un luga hopi special pa relaha y disfruta, cu un diseño pensa pa integra cu harmonia na e beyesa natural.
Tocante Smith Warner International
Ta e compania mas grandi den Caribe cu ta specialisa den ingenieria di costa, maneho di zona costero, oceanografia, EIA (Environmental Impact Assesment) Marino y e construccion y supervision di proyectonan den e tereno aki. For di su fundacion na 1995, a obtene un reputacion solido pa su uzo di tecnologianan moderno balansa cu un comprondemento di e necesidad pa solucionnan apropia pa e region. Pa mas informacion, bishita www.smithwarner.com.
Leed
E Leed (Leadership in Energy and Environmental Design) Green Building Ratin System ta un programa boluntario di certificacion dirigi pa reenforsa y promove e prestacion halto di edificionan sostenibel. Ta evalua e impacto medio ambiental den cinco categoria cu ta afecta salud humano y medio ambiente. E categorianan ta Luga Sostenibel, Eficiencia di Awa, Energia y Atmosfera, Materialy Recursonan y Calidad Ambiental Interior. Pa mas informacion, bishita www.usgbc.org.
