Grupo interesa pa bin cu boutique hotel na San Nicolas: Construccion oficial di proyecto Baby Beach Promenade

Den su delaster conferencia di prensa, minister di Turismo, Dangui Oduber a referi na varios proyecto cu ta tumando luga den sector turistico y cu e mandatario ta considera noticianan cu ta positivo. Ya cu cada inversion ta crea un spiraal economico. Ademas e ta crea cupo di trabou y e ta yuda nos economia.

Minister Oduber a bisa cu oficialmente e proyecto Baby Beach Promenade su construccion ta tuma luga diamars awor. Gobierno ta contento cu e proyecto aki por continua a pesar di tur e retonan y problema financiero causa pa Covid. E ta plania cu pa aña venidero 2021 e proyecto aki lo bin cla y entrega por completo.

E mandatario a bisa cu e ta un proyecto hopi bunita cu lo bira un balor agrega pa San Nicolas cu sigur lo yuda stimula economia den e districto aki. Pero tambe e proyecto aki lo crea empleo durante e periodo di construccion, y e lo bira un atraccion pa turistanan. E tabata un proyecto cu debi na e pandemia di Covid no por a sigui y tampoco financia manera e tabata plania. Nan mester trece cambionan den e proyecto na Baby Beach pa di un manera creativo nan por haya e fondonan pa e por continua.

Tambe tin proyectonan cu ta bin tumando luga na Baby Beach, entre nan e construccion di The Secret Baby Beach Resort. Pero tambe mas proyectonan den e area cu ta encera amplia mas e beach y pone mas santo blanco y percura pa crea mas espacio pa parkeer.

Pero tambe mehora infrastructura den e area entre nan traha mas baño disponibel pa publico cu ta un di e kehonan mas frecuente di nos bishitantenan y embeyece e area natural aki. Igualmente lo construi kiosconan.

Tambe na Roger Beach nan a drecha e piernan y bin cu dos mas cu ta wordo hopi usa. E mandatario a bisa cu tin hopi interes pa e desaroyo na San Nicolas y recientemente nan a haya un presentacion di un grupo cu kier desaroya un boutique hotel, esaki “conforme nos maneho y vision,” el a bisa. Pues un hotel chikito di calidad hopi halto, y e ta spera cu gobierno por logra concretisa e proyecto aki.

Igualmente tin algun inversion cu ta tumando luga den nos industria turistico cu ta un muestra cu sector hotelero tin confiansa den nos pais y den nos economia. E compania Hyatt a haci un inversion di mas cu 15 miyon dollar den un pool pa adulto cu ya caba ta cla. Tambe Divi Tamarijn a renoba tur nan cambernan cu a nifica un inversion cuantioso, y ayera nan a realisa un bishita den nan instalacionnan pa mira e renobacionnan aki.