Diamars ultimo, grupo End Child Abuse ‘Ta Basta’ a yama medionan local pa haci un conferencia di prensa y trece dilanti algun puntonan di con nan ta wak e Social Crisis Plan y kico nan colaboracion como grupo ta bay ta cu nan.

Asina a expresa Danny Marquez ken ta un di e lider di e grupo aki y ken a expresa cu End Child Abuse a organisa su prome manifestacion dia 3 di juli caminda nan a entrega 18 punto na e mandatarionan na unda el a sigura cu presidente di parlamento Ady Thijzen a bisa pa nan cu den un siman nan lo cambia tur e punto cu a wordo entrega “te dia di awe, nada a wordo haci”, Marquez a bisa.

Asina mes, el a declara cu nan a organisa su di dos actividad pa nan por sinta cu tur e minister y instancianan concerni pa nan por pasa riba e puntonan y wak con por cambia algun di biaha of cua punto lo tuma tempo pa cambia.

“Poco hende a responde, nos no por organis’e atrobe pa problema di Covid-19”, Marquez a comenta y tambe a bisa cu 4 di september nan a organisa un otro accion pero nan a dicidi di haci’e sin vergunning pa motibo cu ora nan a pidi e prome el a wordo nenga.

Cuerpo di polis a tuma contacto cu nan segun Marquez, nan sinta na mesa pa asina nan por subi na caya y busca e contestanan pero sin sa kico a pasa e dia ey den mey di e manifiesto “polis a desvia di e palabracion y nan a kibra e manifiesto” el a informa.

Di mesun manera, el a laga sa cu nan a papia cu minister di Husticia Andin Bikker y minister di Labor y Asuntonan Social Glenber Croes riba e puntonan pero nan no a haya e contesta cu nan ta buscando.

Di esaki, e grupo a wordo a informa cu nan lo haya un presentacion di Social Crisis Plan (SCP) e cual tabata dia 7 di september ultimo,den e reunion aki nan a haya informacion tocante 31 proyecto social y 500 persona profesional cu ta trahando riba e proyecto aki.

Tambe, den reunion nan a yega di papia tocante cuater punto so y cu nan ta wardando pa un otro fecha di un otro reunion y nan ta espera cu manera na parlamento a wordo trata e topico di corupcion nan tambe ta espera cu lo mas lihe posibel nan por trata e tema aki cu ta trata di abuso di mucha.

“E comunicacion cu SCP a bay un poco malo y nos tambe a cansa di sinta warda sin haya contesta, pero despues nan a comunica nos cu un par di punto a wordo cambia caba”, Marquez a expresa.

Di esaki, Marquez a sigura cu nan kier e puntonan aki firma pero nan no a ricibi nada, “e puntonan aki ta hopi importante pa nos pasobra cu esey no por bisa cu e gobierno aki ta tumando e cos aki na serio, pero desde 3 di juli te aworaki october nos ta wardando ainda”.

Di loke ta trata e parti di ley, Marquez a afirma cu nan ta un hopi desapunta, dianan pasa un par di ley a wordo adapta el a nombra como ehemplo esun di piscadonan, “pero nos di End Child Abuse ta wardando pa ki dia Gobierno y instancianan concerni ta trata e parti di nos documento caminda e leynan ta?”, Marquez a afirma.

“Nos no ta un grupo di ciudadano cu ta traha den departamentonan di asunto social, nos ta un grupo di ciudadano concerni cu ta wak un par di problema cu tin y nos kier trece esey dilanti” Marquez a menciona.

Di mesun manera, el a splica cu e grupo aki semper ta para na banda di pueblo y nan semper ta keda vigila e proceso pa wak si cambionan ta wordo tuma na serio, “End Child Abuse por colabora cu SCP y trece ideanan manera nan a trece caba pa e problemanan cu tin actual”.

Loke ta importante awor, Marquez a sigura ta pa stop di abuso di mucha cu ta birando hopi alarmante, cada dia tin mas caso, “e pedofielnan ta coy forsa pasobra nan ta sali hopi trempan for di prizon” el a señala.

Marquez a sigura cu e unico personanan cu por trece e cambionan aki ta gobierno actual, cu nan por sinta cuanto biaha tin mester cu SCP pa trece ideanan pero e ministernan concerni ta firma e documento y bay di acuerdo cu e puntonan y esey ta loke nan ta wardando, ademas tambe nan kier sa kico otro parti di coalicion y oposicion ta pensa di nan puntonan.

“Mi no sa si nan tin miedo of e muchanan no ta un prioridad”, el a finalisa.