Danny Marquez, miembro di e Grupo End Child Abuse tambe conoci como “Ta Basta”, a ofrece un entrevista pa Bon Dia Aruba pa manifesta loke aña 2020 tabata pa e grupo aki y loke nan tin den plannan pa 2021.

Grupo End Child Abuse a keda conoci den comunidad pa via di un manifestacion masha grandi cu a haci na Aruba dia 3 di juli ultimo contra abuso sexual di mucha, na unda durante cual nan a entrega un manifiesto pa Gobierno di Aruba y Parlamento cu 18 punto di e problemanan cu nan a wak den proceso ora cu ta haci un denuncia di abuso sexual.

Di esaki, Marquez a bisa cu eynan tambe ta e proceso di duna un veredicto pa un abusador y ki tipo di castigo e ta bay haya.

Despues cu nan a entrega e manifiesto aki, nan a duna gobierno un periodo di 30 dia pa nan por contesta e grupo back. Marquez a afirma cu un luna despues nan a organisa un otro manifestacion, pero esey no a bay door pa via di e di dos ola di Covid-19. Pero si nan a haci un ‘Drive by’ na unda nan a haya 3 punto mas pa locual a bira 21 punto den nan manifiesto.

Marquez a señala cu tambe nan a stipula un periodo pa nan por wak un cambio, algun di e cambionan por dura seis luna y otronan un aña, por ehemplo, pero esey no a tuma luga.

Ora nan a entrega e manifiesto, el a comenta cu nan a papia cu Social Crisis Plan y a presenta nan rapport cu nan ta saca cada cuanto luna, “pero e ta un plan cu tin cifranan aden. Den teoria e ta bunita skirbi, pero den practica e no ta asina”, el a afirma.

El a pone como ehemplo dos caso cu a tuma luga recientemente, na unda un mucha a scapa for di interna na luna di october y casi un luna despues a haci e denuncia. Otro fundacion hunto cu e grupo aki ta esunnan cu a haya e mucha back, segun loke Marquez a sigura. “Akinan bo ta wak tur e sistema cu nan tin, e codigo di proteccion a pasa y ni un hende a haci un denuncia pa e mucha. Na unda tur e instancianan a keda?”

Tambe el a trece dilanti un otro caso, na unda e mama a sali den medionan di comunicacion cu su dos yiu haciendo un denuncia un par di luna pasa, di e cual el a resalta cu Social Crisis Plan tin dos aña caba, pero “ni un instancia a bis’e mes na unda e tin cu bay. Esey kiermen cu nan mes ta bruha”.

Igualmente el a menciona cu tin algun instancia cu ta traha bon y otro cu no ta funciona manera mester ta. Y pa e motibo aki Marquez a bisa cu nan ta bay den medionan di comunicacion pa trece tur nan fout dilanti. Pero “gobierno mes ora cu nos a entrega e prome 18 punto ta bisa cu nan tin e Social Crisis Plan cu algun punto caba, pero nos a pidi nan pa mustr’e y nada no a cambia” Marquez a comenta.

El a sigura cu tres punto solamente tabata den proceso. Un di nan ta Family Justice Center, cual nan ta haya como un punto super bon. Esaki ta un centro na unda e personanan por haya profesionalnan den sector social, enseñansa, salud publico, y husticia den mesun luga ora e abuso caba di tuma luga. “Tur investigacion, tur e tratamento pa e victima ta pasa ey bao y esey ta un cos cu nos ta haya hopi bon”, Marquez a manifesta.

Tambe Marquez a afirma cu nan ta pensa cu Aruba mester haya mas Family Justice Center rond di e isla, pero nan no tin siguridad si esey lo cuminsa otro aña.

Ademas Marquez a trece dilanti cu ta lamentabel cu ora di campaña hopi di e gobernantenan ta usa e topico aki pa haya voto, tambe hopi di nan a haya un funcion, pero nan no a actua. “Otro aña cu ta aña di eleccion, hopi politico ta bay usa e topico aki como [tema di] campaña.”

El a sigura cu tin gruponan politico of partidonan cu ta lantando cu tambe a cuminsa haci entrevista cu cierto personanan den e area, “pero dia 3 di juli ni un di nan tabat’ey dilanti parlamento.Eynan bo ta wak con e campaña cuminsa”, Marquez a expresa.

El a anuncia cu otro aña nan lo bay ta hopi skerpi. Nan ta bay haci un conferencia di prensa na comienso di 2021 riba kico a cambia y kico no a cambia.

Marquez a afirma cu desde cu e grupo a cuminsa, nan a haya algun incidente cu personanan cu ta liga cu cierto ministernan, y cu ora nan a wak cu e grupo a cuminsa haya mas forsa, menasanan a cuminsa cay riba nan y nan famia door di e supuesto pedofiel, segun loke Marquez a expresa.

Esaki tambe a wordo refleha den nan trabao, na unda Marquez a bisa cu tin hendenan cu a yama nan hefe pa por kita nan di nan trabao. “Constantemente nos ta hayando menasa ora nos ta bezig cu e topico aki y mi no ta kere cu e ta bay stop tampoco. Ta existi hende cu no ta wak e lucha aki como un lucha di mucha.”

Ademas, el a enfatisa cu tin politiconan den pasado cu a comete algun acto ilegal y tin hende cu ta sostene nan. E hendenan aki ta bira nan siguidonan y ora nan ta wak cu un persona ta ataca nan idolo, nan lo bira contra e persona. “Esey nos a experiencia hopi den nos movemento di Ta Basta”, Marquez a declara.

Pa aña 2021 Grupo End Child Abuse kier trece mas casonan dilanti. Algun di nan ta pasando den medionan di comunicacion y asina ta mustra con mal e maneho ta. Tambe nan ta pensando pa bay den area di conscientisacion, pa yuda e comunidad pa nan sa, nan ta trahando riba un foyeto pa mustra con e hende mester cana y cua instancianan nan mester bay ora e acto di abuso ta pasa. Igualmente nan kier haci programanan di conscientisacion na scol- y barionan.

El a manifesta cu gobernantenan no sa kico kiermen ora un persona a wordo abusa of kico e topico di abuso sexual ta, pa motibo cu nan a tarda hopi pa cambia un par di cos. “Tur loke nan por a cambia pa Covid-19, pa baha un minister y pa ley di abuso di mucha, boso no por sinta cu un par di hurista?” Marquez a finalisa.