Grupo End Child Abuse ‘Ta Basta’: “Nos kier pone presion pa asina gobernacion cuminsa haci algo”

Awe tardi na un restaurant reconoci a tuma luga e conferencia di prensa di e grupo ‘End Child Abuse, Ta Basta’, na unda cu nan a trece dilanti cu dia 3 di juli awor nan lo subi caya pa exigi solucion y cambionan pa abuso di mucha no sucede mas.

Asina a duna di conoce Mitchell Ho-Asjoe, ken tambe a splica cu e grupo a wordo lanta den poco dia. Primeramente nan lo a kier a bay blokea KIA tempo cu un persona acusa presuntamente di ta pedofiel lo sali. Despues e plan a cambia y nan a dicidi di forma un grupo pa cambia e manera con hende acusa di pedofiel ta wordo trata na Aruba.

El a menciona cu nan kier haci hopi cos diferente, pero pa diabierna awor, nan a yama Cuerpo di Polis di Aruba, Corte, entre otro pa duna di conoce cu nan ta bay haci e actividad aki uno oficial. El a specifica cu nan no ta un grupo cu ta apoya violencia, pa motibo cu riba rednan social a keda conoci cu cierto personanan kier tuma violencia den nan man y causa destruccion.

“Violencia no ta e plan, esey no ta yuda pa nos logra e meta”, Ho-Asjoe a comenta. Si dado momento algun persona tin pensa di haci esey, mester tene cuenta cu muchanan lo bay ta presente den e manifestacion aki.

E grupo lo bay manifesta dilanti di Corte pa 3or di atardi y despues nan ta bay parlamento. Pero e cos ta cu departamentonan concerni pa loke ta trata abuso di mucha, na unda e meldpunt ta drenta, eynan tambe mester cuminsa drecha e sistema, pa motibo cu esaki ta algo cu no ta cuminsa na Corte. Ho-Asjoe a informa cu a tene reunion cu diferente departamentonan y e problema cu nan ta wak ta e keho policial, henter e proceso, y tur instancia cu ta relaciona cune. Segun e mes a sigura ‘nos ta bay cambia esey poniendo presion’.

“Nos kier pone presion pa asina e gobernacion cuminsa haci algo” el a informa.

Ademas el a expresa cu e prome dia cu nan a tene nan prome reunion riba parkeerplaats di Alhambra, nan laga hopi cla cu nan no ta asocia cu ningun grupo politico y nan ta anti- violencia. Di esaki el a afirma cu esey ta trata di otro gruponan cu no ta contento pa via cu nan tin basta aña bringando e lucha aki y nada no a wordo haci; pero esaki ta pa trece e pueblo dilanti.

“Nos ta sinti nan dolor. Mi por compronde cu si bo ta bringando tanto aña caba y bo no ta wordo atendi, tin frustracion. Pero si nos bringa aworaki nos ta perde e causa”, el a sigura.

Diabierna awor no lo ta e prome paso cu nan lo tuma. E grupo a sigura cu lo sigui tuma accion den e lucha. Tocante e firmanan cu nan ta recauda den comunidad, Ho-Asjoe a manifesta cu di e manera aki hende ta sinti cu e personanan por wordo involucra cu e causa y di ki manera nan por yuda. Pa e motibo ey nan a apoya esey y asina por yega na un target di 10.000 firma, cu despues lo entrega na parlamento y gobernador.

Tambe, ta existi otro persona cu ta forma parti di e lucha aki, cu ta Reginald Danies, pero e no tabata presente den conferencia. A puntra e motibo di su ausencia, pa loke el a contesta cu tin comunicacion cu otro gruponan, pero tin diferente hende cu tin diferente herment pa yega na comunidad pa cumpli cu e meta. Di mesun manera nan ta enfoca den e meta cu nan kier haci.

Di su parti, Dany Marquez, miembro di e grupo, a laga sa cu hende mester wak bon cu comunidad tin gran parti den e problema di pedofilia y abuso di mucha. Prome cu e problema yega na gobierno, comunidad tambe tin cu zorg pa muchanan, wak pa muchanan y lanta nan bon. Educacion ta un yabi, pero si tin un fayo den e linea ey, e ta bay pa gobierno y no por culpa gobierno pa tur problema.

“Nos mester tuma e responsabilidad y kibra e tabu, pasobra tanten cu nos tin e cos aki cera den cas, no tin keho policial, e abuso ta keda bay”, Marquez a comenta.

Un punto cu Marquez tambe a menciona, cu ta hopi esencial, ta educacion sexual pa muchanan. Mester promove esey tambe pa no tin casonan tipico aki, cu ta escala y ta keda scondi. Eeducacion ta cuminsa na cas, mester cuminsa cu e mayornan mes ta siña e muchanan, e señalnan, kico si y kico no y esey tambe tin cu bay scolnan.

Igualmente, Marquez a enfatisa cu tin hopi rabia den comunidad, pa motibo cu hopi muchanan a wordo abusa y nan no a haya oido. ASoraki henter Aruba ta cansa di tanto caso cu ta pasando y a pasa, p’esey a bin e lema ‘Ta Basta’. “Nos no ta bay soporta esaki mas, nos ta pidi cambio, nos kier y exigi un cambio”, el a declara.

Pa finalisa, el a pidi pa esunnan cu lo uni pa e manifestacion di diabierna awor pa trece un peluche den señal simbolico pa tur e mucha cu a wordo abusa sexualmente na Aruba y rond di mundo.