Durante un sesion informativo di Stichting End Child Abuse ‘Ta Basta’ a trece dilanti diferente topico. Entre nan, e problema di abuso cu ta bin sucediendo na Aruba, pa loke nan a enfatisa mester curasha comunidad pa papia ora un caso di abuso ta tumando luga.

Mitchell Ho-Asjoe presidente di e fundacion aki hunto cu Dany Marquez cu ta secretario a haci un live sesion riba e plataforma social Facebook pa motibo cu tin hopi cos malo cu ta pasando na Aruba.

For di dia 3 di juli di aña pasa cu diferente organisacionnan a encarga pa organisa e manifestacion masal ey contra abuso sexual di mucha y cu nan a entrega un manifiesto na diferente politico y gobernante di Aruba, segun Marquez a menciona nan a bisa cu for di e dia ey nan lo cuminsa haci cambionan y te dia di awe nan no a tende nada, “te ainda e mesun cos ta tranca, sistema no ta pusha nan manera mester ta”.

Di loke ta trata e Social Crisis Plan, Marquez a bisa cu e ta un bunita plan hinca den otro pero apart di esey mester bin un plan di strategia caminda cu ta para cu e problema di biaha.

Ta p’esey e motibo pa e cual e grupo aki ta para p’e y ta bringa pa conscientisa e ministernan cu mester bin un cambio, “pasobra nan ta esunnan cu ta na mando”, Marquez a señala.

Asina mes, nan a informa comunidad cu nan a publica un revista cu ta yama “The day Aruba wore Black” e cual nan a bisa cu ta un magazine cu casi 900 potret cu segun Ho-Asjoe ta un publicacion hopi emocional di kico a pasa e dia ey y tambe tin informacion di cual ta e vision y mision di e fundacion.

E obhetivo di esaki ta pa crea un fundraising pa motibo cu nan no ta haya subsidio di Gobierno pero cu e lucha mester di fondonan pa por bay dilanti, asina como tambe nan a haya algun casonan di difamacion.

Pa cu esaki, Ho-Asjoe a comenta cu nan kier conscientisa e comunidad pa loke ta trata e plataforma Facebook debi na cu ta existi un grupo na unda e personanan ta expresa su mes, nan ta trece nan casonan di abuso dilanti y di mesun manera nan ta acusa un persona di ta un pedofiel of ta difama un otro persona cu pa algun biaha esey ta trata di difamacion.

Difamacion ta trata di informacion negativo cu ta wordo bisa den publico of ta wordo skirbi di un persona contra su nomber, su fama y honor, specialmente ora esaki ta algo falso.

Marquez a splica cu tin personanan cu ta dedica pa difama un persona pero nan no a entrega un keho contra dje y nunca a wordo haya un sentencia y “esey no ta un prueba pa bisa cu e persona ta un pedofiel” pa motibo cu e persona ey ta bay entrega un caso den contra y lo haya un carta di abogado.

Di loke ta trata caso di abuso, e personanan mester ta hopi cauteloso di loke ta bisa y con ta trece su punto dilanti pa motibo cu hopi hende ta busca abogado pa defende nan mes “si e acto di abuso a wordo haci, nos no sa pero semper mester tin prueba”, Marquez a declara.

Di mesun manera, nan a papia di un caso cu comunidad a conoce algun dianan pasa di un crèche na unda algun personanan a afirma cu eynan hopi caso di abuso a tuma luga, di esaki, Ho-Asjoe a expresa cu tabatin basta hende cu a acusa e crèche aki pero nan no a bin dilanti pa conta kico a pasa.

Tin manera pa persona por haci denuncia y cu nan ta keda anonimo, segun Marquez a bisa pero esey ta keda di parti di autoridadnan concerni, “e por pero e ta un otro proceso” ta p’esey cu mientras mas hende ta bin y trece su caso dilanti tin mas informacion pa e persona acusa por haya un sentencia mas halto.

“Si bo ta conoce un persona cu ta pasando den un caso di abuso, encurasha e persona ey pa haci un denuncia, mientras mas hende ta haci denuncia e caso ta bira mas pisa”, Marquez a bisa.

Tambe, nan a trece dilanti e caso di un persona na Corsou y cu a wordo gara ora tabata haci acto di mishimento cu un mucha menor di edad e cual el a haya como castigo 9 aña y tambe, segun Ho-Asjoe e mester a paga 50 mil florin pa daño y perhuicio, “mi ta kere cu esey no a pasa na Aruba ainda cu un sentencia asina hopi halto”.

Segun Marquez a splica cu e Recherche a bisa p’e ta cu nan tabatin evidencia, videonan y basta hende cu a bin dilanti pa papia di e persona aki pa motibo cu e mayoria di parti, e abusado tin mas cu un victima y esey a yena e rapport cu mas forsa na unda na Corsou nan a traha algo hopi mas pisa.

Asina mes, nan a remarca cu na Aruba ta yegando e tempo pa tur hende habri nan wowo pa wak kico ta pasando, “abuso hudicial for di ariba te bin abou ta abusa di nos, e sistema ta asina manera cu ta pone hopi rabia riba e personanan cu no sa kico pa haci”, Ho-Asjoe a señala.

Ta tres linea cu mester ta riba e mesun punto, manera Marquez a comenta cu ta instancianan, leynan y maneho, pa motibo cu tanten cu e tres aki no lo ta bon sincronisa, e casonan ta bay keda bin dilanti pa motibo “cu abusado semper ta sali privilegia, victimanan ta keda perhudica y e sentencianan tambe ta bay keda abou”, el a sigura.

Pa finalisa, nan a trece dilanti cu nan ta di acuerdo cu e Social Crisis Plan y esey ta e solucion na e momentonan aki, pa motibo cu nan ta informa e comunidad cada kwartaal, ademas di e proyecto di Familia Justice Center na unda a keda conoci cu e lo por traha manera un MFA caminda cu tur profesionalnan lo ta den e mesun luga ora e acto di abuso a pasa caba y cu lo a mester cuminsa na januari ultimo pero te ainda e fecha no ta conoci.