Accion venezuela (1).jpg

Mientras cu den henter teritorionan di Venezuela hendenan a cuminsa mobilisa pa loke a wordo yama e “Toma de Caracas” pa pidi e mandato revocatorio di Presidente Nicolas Maduro, akinan na Aruba un grupo di Venezolano cu bandera y borchi a congrega dilanti di Consulado di Venezuela pa mustra nan solidaridad cu e marcha di Caracas y cu nan exigencianan. Sra. Laura Luces den nomber di tur e Venezolanonan dilanti di e sede consular di Venezuela cu na momento cu e accion aki a tuma luga tabata bashi y cera, a laga sa cu esaki ta expresion di un “falta di gobierno”. E ta reconoce cu awendia Venezuela ta masha dividi, di un banda tin e grupo di oposicion y di otro banda e grupo Chavista y pro Maduro.

“Toma de Caracas”

Den oranan di merdia, Sra. Luces a bisa cu e “Toma de Caracas” a bira un exito a pesar cu e “regimen di Nicolas Maduro a percura di tur forma di boicotia esaki”. El a agrega cu tin cierto accion di violencia contra un grupo di indjan cu a bin for di region di Amazona, pero a pesar di tur intimidacion e “pueblo di Venezuela ta firme y nan ta dicidi pa participa na e gran “Toma de Caracas”. Igualmente el a bisa cu e pueblo di Venezuela tin un derecho constitucional cu ta e referendum revocatorio y cu –segun nan- ta wordo viola sistematicamente dor di CNE (Conseho Nacional Electoral ) y nan a exigi dilanti Consulado di Venezuela na Aruba pa nan  “reactiva loke ta nos derecho constitucional. Nos no ta pidi nada cu no ta aparece den e Constitucion”. Aunke nan ta bibando pafo di Venezuela nan ta stima nan pais y hopi di nan ta desea di bay bek, pero ta dificil pa nan bay pa e situacion dificil cu e pueblo di Venezuela ta pasando aden, el a bisa. “No tin remedi ni cuminda, y e situacion di insiguridad ta grandi… Awendia e situacion Venezolano ta teribel”, segun Sra. Luces.

Danki na Aruba

Den nomber di tur esnan presente, Sra. Luces a lamenta cu un pais asina rico manera Venezuela ta, nan ta pasando den e situacion teribel aki. Na final el a bisa cu nan ta expresa nan palabra di “danki” na e pueblo ruman di Aruba pa nan ayudo grandi, specialmente cu e ayudo di remedinan. “E Venezolanonan ta bin akinan pa cumpra remedi y alimento pa nan por bay cu nan pa Venezuela”, el a bisa. El a haci un suplica pa Aruba no fada di nan pasobra “pueblo di Venezuela ta uno masha humano y hopi trahado y corecto”. E ta lamenta cu un grupo chikito di Venezolano ta bin haci delincuencia na Aruba, nan no ta refleha e bon virtudnan di e gran mayoria di Venezolanonan. “Semper nos a wak Aruba como un centro turistico”, el a bisa.

Consulado di Venezuela

Bon Dia Aruba a papia ayera cu Sr. Luis Cardenas cu ta miembro diplomatico di e Consulado di Venezuela na Aruba kende a bisa cu e grupo cu a bay expresa su solidaridad cu e “Toma de Caracas” tin tur derecho pa haci loke nan kier a haci. Pero logicamente nan mester respeta e sitio unda nan ta manifesta. Igualmente el a destaca cu ta importante pa informa riba e “rueda di negoshi” na Holiday Innunda ta participa gobierno di Aruba, y otro instancia local hunto cu empresarionan di Venezuela.

“E luga aki mester ta yen di e medionan di Aruba. Atende un actividad di apenas 10 persona cu nan tin un posicion, pa nos esaki no ta relevante awor. “Pa nos ta relevante awor traha pa nos patria”, el a bisa. Sr. Cardenas a laga sa cu den e rueda di negoshi aki cu ta culmina awe te cu 6’or atardi tin mas cu 70 empresario di Venezuela.

Ciudadano di Aruba solidario

Di otro banda e ciudadano Arubano, Sr. Carlos D’Isle a expresa su preocupacion pa loke ta sosode na Venezuela, ya cu tur cos cu ta sosode den e pais bisiña aki tin su influencia na Aruba. Durante e accion di ayera, e tabata masha indigna cu e gobierno di Aruba tabata reuniendo ayera y awe cu un delegacion comercial di Venezuela. “Kico nan ta papia cu un gobierno fascista, dictatorial y criminal… E no por!”, el a bisa. E ta haya inaceptabel cu gobierno di Aruba ta deal cu gobierno di Venezuela cu ta lagando un pueblo muriendo di hamber na su pais. “Awor nan ta haci un deal cu Citgo y cu Jose Faria un deal comercial. Kico esey ta?. Nan tin hamber di placa?”, el a bisa.

Sr. D’Isle a bisa categoricamente cu e gabinete di Mike Eman mester bay cas mescos cu e gobierno di Nicolas Maduro. E ta considera inaceptabel loke ta sosodiendo na Aruba y na Venezuela.