Ariba rednan social y algun medio di comunicacion por a tuma nota di un noticia circulando cu a causa preocupacion den comunidad. Ta trata di un grupo di turistanan Arubiano cu a bay bishita Israel, pero cu keda pega na e pais pa motibo cu nan vuelo a cancela.
Recientemente den medionan di comunicacion internacional por a mira e noticia cu Israel a declara guera contra Palestina despues cu un atake sorpresa di parti di un grupo di militante Palestino, HAMAS, na Israel.
E noticia aki a causa preocupacion y desesperacion pa hopi den e region aki, na nivel mundial y consecuentemente hopi operacionnan a wordo afecta, entre otro e vuelonan cu ta sali for di, y cu destino pa, Israel.
Un grupo di turista Arubiano cu tabata di vakantie bishitando e tera santo a wordo confronta cu e noticia alarmante cu nan vuelo a ser cancela y nan no por sali for di e pais cu aworaki ta den pleno guera contra Palestina.
Prome Minister di Aruba, Evelyn Wever-Croes, a tuma nota di e situacion aki y a tuma accion den su propio mannan. A traves di su pagina di Facebook a mandatario a indica cu el a haci su maximo esfuerso y a comunica cu diferente instancia pa logra cu e grupo di residentenan Arubiano por a sali for di Israel.
“Mi tabata bezig henter mainta cu Buitenlandse Zaken, Embahada na Israel y e grupo mes y por informa cu nan a caba di pasa inmigracion y ta saliendo for di Israel cu e mesun aerolinea cu nan mester a sali mas trempan, esta Turkish Airways. Pues e grupo di nos ciudadanonan na Israel ta saliendo di Israel awor. Danki na Directie Buitenlandse Betrekkingen di Aruba y Ministerie van Buitenlandse Zaken di Hulanda,” el a indica.
