Un grupo di trahadonan di Directie Arbeid & Onderzoek conhuntamente cu Departamento di Integracion, Maneho y Admision di Stranhero (DIMAS) ayera mainta a acudi na e yamada di accion di protesta organisa pa diferente sindicatonan cu ta pidi pa stop e retencion di 12.6% di nan salario.

Nanette Alders ken tabata vocero di e grupo cu a pone plat nan trabou durante un par di ora pa mustra nan mal contento a bisa na prensa presente cu nan ta mal contento pa motibo cu a bisa na nan cu ta bay den recorte pa yuda e pueblo cu ta sufriendo, personanan cu a keda sin salario pa via di pandemia di Covid-19 “nos a pone man riba nos curason y nos a coopera cu boso nan tur y nos a entrega 12.6%, bou di e situacion ey nos a wordo bisa cu e momento cu e cos aki para, e subsidio, e recorte tambe ta para, esey kiermen cu a nos tambe mester stop di entrega, bo mester tin palabra como politico”, Alders a menciona.

Asina mes el a señala cu si den un prome momento e medida lo a keda tot nader order nan mester a sinta na mesa conhuntamente pa tur banda por papia, sin ningun clase di cos secundario “boso a duna nos e palabra cu si nos coopera, un bes cu caba cu FASE y Loonsubsidie, nos ta haya nos placa back, a wel, awor nos tin nos derecho pasobra nos ta a nos so a sali y protesta, ta nos tur ta mal contento”, Alders a comenta.

Josephine Albertus presidente di Sindicato di Maestronan di Aruba (SIMAR) y Magaly Brito di Sindicato SEPPA tabata presente den accion aki na unda cu Albertus a señala cu el a sostene diferente departamentonan cu a dicidi di uni na e protesta aki “pasobra nos ta den e lucha tur hunto y e ora ta bunita pa wak tambe e union cu otro coleganan sindical pasobra e no ta un lucha facil”, el a bisa.

Tambe el a trece dilanti cu algun personanan a cuestiona e accion aki unda a indica cu nan no kier ta solidario pa loke Albertus a señala cu “nos tabata solidario pa 21 luna”, asina mes el a sigura cu si no tabata pa sindicato no lo tin subsidio di salario tampoco y nan ta solidario cu tur cos.

“Tur caminda bo ta tende e mesun problematica, tur caminda ta e mesun cos cu gobierno no ta transparente unda cu nos no por a haya e suma di cuanto nos a genera cu e recorte di 12.6% y kico esey tin di malo aden? ta mescos si bo ta paga algo a bo tambe kier cuanto bo ta paga, ¿pakico a nos no mag di pidie?” Albertus a expresa.

Di su parti, Magaly Brito di SEPPA a comenta cu esaki ta un grupo di trahadonan cu ta afilia na e sindicato aki na unda nan como dirigente sindical tabata bishitando esun cu a uni na e protesta aki pa sostene nan y cu nan lo hiba e mensahe di trahadonan na mesa di discusion.