E grupo trahado cu te hasta ultimo momento a traha cu Valero, prome cu e acuerdo final cu Gobierno a bin cla, no lo cuminsa traha automaticamente cu Citgo.
Nan no lo wordo contrata pa traha cu Citgo, manera tur hende a kere, sino cu nan lo forma parti di e compania estatal cu ta lantando, esta Refineria di Aruba NV. Pero esaki no a keda oficialisa ainda pasobra e leynan cu ta regla esaki, parlamento mester trata nan ainda y duna aprobacion.
Despues di un reunion cu a tuma luga recientemente entre minister di Labor, Paul Croes y presidente di sindicato IOWUA, Boy Anthony, cu presencia di Mediador di Gobierno, a keda cla cu e grupo di trahado aki lo drenta na servicio di e compania estatal. Ta asina cu bou peticion di e sindicato, oficina di Mediador di Gobierno mes a coordina e reunion aki, unda e lider sindical a expresa nan preocupacion riba diferente punto relaciona cu tur su miembronan.
Ex trahadonan di Valero
No solamente nan a expresa nan preocupacion sino cu nan kier sa con e acuerdo cu a wordo firma pa opera e refineria ta y lo ta den futuro. Ya cu tin un grupo di trahado cu ta traha directamente cu e refineria, y tambe otro grupo cu ta pertenece na e refineria cu tin otro acuerdo di trabou. Nan ta e trahadonan cu entre otro ta percura pa suministra combustibel di avion na aeropuerto, y tambe esun cu ta encarga di transporta e gasolin y combustibel diesel na e pompnan di gasolin.
Bon Dia Aruba a acerca Mediador di Gobierno, kende a bisa cu e tipo di preocupacion expresa pa IOWUA ta uno valido. Sinembargo no mester lubida cu e ley laboral cu a wordo pasa entre 2013 y 2014 ta proteha e trahado tambe na momento cu un compania otro ta tuma over, pues e compania cu ta drenta tin cu tuma tur responsabilidad. Aunke esaki ta hancra den ley, IOWUA kier a scucha for di Gobierno con lo para cu e situacion y status di nan trahado.
Igualmente e dirigentenan di e sindicato aki a duna minister di Labor un cantidad di recomendacion, conseho y sugerencia basa riba experiencia di pasado. Hopi di e dirigentenan di IOWUA tin un trayectorio largo di mas cu dos decada trahado den e refineria y nan kier preveni prome cu e refineria ta cuminsa opera debidamente.
Un aspecto tin di haber cu e importacion di trahado di afo, ya cu Aruba no tin suficiente trahado pa den un periodo di 18 luna of mas cu esaki lo por transforma e refineria aki. Tambe otro aspecto tin di haber cu siguridad na pia di trabou, conscientisacion di e trahadonan y mas puntonan importante pa minister di Labor tene cuenta cu nan.
Mas reunion
E palabracion ta cu nan lo sostene otro reunion mas extenso ainda cu lo envolvi mas hende entre nan minister Mike de Meza y algun miembronan di e comision negociado pa asina nan comparti cu e dirigentenan di IOWUA e diferente punto di preocupacion.
Pero tambe pa e sindicato por tin garantia cu su miembronan cu no ta traha directamente cu e refineria, pero cu ta cay den e contracto colectivo (CAO), pa nan continuidad y condicion di trabou ta keda intacto y garantisa. Tin algun di e CAO aki cu ta vence na 2017 y otro na 2018.
Preveni problema
Mediador di Gobierno a elogia e reunion aki ya cu a trece bastante claridad y a kita poco di e inkietud cu tabatin cerca e dirigentenan di IOWUA. E ta kere cu den e proximo reunion cu ainda no ta programa lo bin algun tipo di palabracion.
Ademas mirando e experiencia y conocemento cu IOWUA tin pa percura cu e sindicato por nombra un of mas representante den e comision encarga cu e operacion diario pa bin cu recomendacion na gobierno. E ta kere cu experiencia cu tanto IOWUA como FTA tin riba e tereno aki lo por yuda preveni hopi cos. Specialmente ora cu nos ta confronta un masa di trahado di afo cu ta bin traha den e refineria, con nos pais por preveni e problemanan cu nos a mira den pasado.
Sr. Pontilius ta corda tempo cu e tabata dirigente sindical di FTA e incidente cu nos a pasa aden cu un grupo di trahadonan Turco y Filipino cu a bin traha den e refineria Coastal. “Nos a mira un cantidad di problema for di contratista di exterior cu ta yega na acuerdo cu grupo di trahadonan den exterior y tene cuenta cu nos leynan.” Naturalmente ora cu e trahadonan ta bin Aruba nan ta bay protesta pa nan derecho y esaki eventualmente lo genera confrontacion. “Y esey nos kier evita”, sr. Pontilius ta bisa na Bon Dia Aruba.
El a agrega cu e volumen di trabou cu lo bini ta uno grandi y tur hende envolvi, entre nan e contratistanan, mester cumpli cu nos ley debidamente cu e trahadonan.
