Operador nobo di ex Aura Casino a sinta directamente cu un grupo di trahadonan pa continua nan relacion di trabou; pagando solamente dos luna di salario atrasa for di tempo cu e casino a cera un aña pasa. A pesar cu e grupo di trahadonan aki a bay di acuerdo, abogado di FTA,  Hose Figaroa  a bisa cu esaki a pasa tras di lomba di e sindicato, ya cu nan no a wordo envolvi directamente.

Mientras cu  otro grupo di e 44 trahado cu no a wordo ofreci nada te cu un par di siman pasa. E operador a ofrece 4 luna pa e 12 lunanan cu nan a keda na cas; pero nan ta keda desemplea. Tin algun trahado cu a tuma e deal aki di cuater luna, a pesar cu  FTA no a bay di acuerdo cu e proposicion ey.

FTA y caso den corte

Sindicato FTA a bin cu nan propio proposicion, y  te hasta nan a kere inicialmente cu tabatin un acuerdo riba dje, pero na final e situacion a cambia. Un par di luna pasa FTA  a cuminsa un caso contra operado nobo. Abogado Figaroa a indica cu nan a bin cu e caso aki  a base di interpretacion cu sindicato mes a haci di e ley of articulo nobo 1615db di Codigo Civil, caminda e operado nobo tin e obligacion  pa tuma tur trahado over y sigui paga nan salario y beneficionan.

E caso aki ta andando ainda den corte. E caso aki lo tuma luga e luna aki, ya cu inicialmente el a wordo posponi pasobra e partidonan tabata hopi cerca di por yega na un acuerdo satisfactorio pa tur hende. Pero na ultimo momento –segun abogado di FTA- e compania a cambia di idea. Esaki a haci cu e deal no a wordo cera y e caso aki lo tin cu tuma luga pronto.

Mediador di Gobierno

Di otro banda mediador di Gobierno, Anselmo Pontilius, envolvi for di cu e problema a surgi den  Aura Casino, a bisa cu e posicion adopta pa e sindicato representando e trahadonan cu ainda no a yega na niun acuerdo, ta comprendibel. Ya cu e sindicato ta sali for di punto di bista cu tin un ley vigente y cu bo tin cu respeta esey.

E ta haya cu e situacion di e casino aki particularmente a bira hopi mas dificil for di e momento cu el a cera caba, ya cu a bira un problema serio. E hotel a scoge pa corta e espacio di e casino y haci’e mas chikito locual a complica e situacion. Esaki kiermen –segun Sr. Pontilius- cu cualkier operador cu ta bini dificilmente lo por tuma e 44 trahadonan den servicio, pasobra no tin espacio.  E di dos aspecto cu a complica e situacion ta cu segun e tempo pasa bay, e operador nobo ta bisa cu e tin cu haci gasto pa trece material y renobacion. Pero tambe nan ta pensa pa kico e tin cu paga un salario pa trahadonan cu no a traha pa nan ainda. Mientras cu e compania prome cu nan a traha pe y  cu tabata nan dunado di trabou, no a cumpli cu su responsabilidad.

E ta haya logico cu e trahadonan den su totalidad ta sinti un decepcion enorme. Pero alomenos un grupo di 26 trahado cu mester di e trabou a scoge pa otro areglo, aunke cu tin e ley. E situacion aki a pone e sindicato den un situacion menos faborabel y e sindicato como cualkier otro sindicato, ta expresa su decepcion den e operador nobo.

Tambe ta evidente cu tin un grupo di trahado cu a scoge pa laga hues duna su veredicto, ya cu nan no ta acepta e oferta di cuater luna di salario enbes di un aña di salario. E ta un grupo mas chikito di e 44 trahado inicial, ya cu e compania nobo cu lo opera e casino bek a tuma 26 trahado.

Un  acuerdo di principio no a wordo firma ainda entre partinan envolvi. E no tin di haber cu e caso di corte cu ainda ta pendiente, sino cu ainda tin algun punto practico prome cu e acuerdo aki lo wordo firma. Ainda ta pendiente pa nan saca e mashinnan cu ta den e localidad di e hotel.