Pa prome biaha den 2017 nos lo por haya cu un sentencia riba e ley of articulo nobo 1615db di Codigo Civil cu mester determina, si a pesar cu e operado nobo no tabatin nada di haber den e operacion anterior di un negoshi, nan mester carga of hereda awor e responsabilidad cu e operador anterior a laga atras sin cumpli cu esaki.
E articulo 1615db di Codigo Civil no a bin su mas. El a wordo traha no pa tempo bon, pero pa tempo malo. Pero net den e tempo malo e no ta funciona, manera ta e ehempelnan tipico relaciona cu e famoso casonan di ex Aura Casino, y esun ultimo di Señor Frogs. Mester bin cu cambio of adaptacion? E abogadonan cu ta representa e operador nobo interesa den casino situa den ex Occidental hotel ta haya cu mester bin cambio den e ley aki, ya cu e no mester ta aplicabel den un situacion totalmente diferente caminda tin bancarota, ya cu esaki ta stroba e inversionista di inverti. Kiermen cu e remedi of solucion cu e ley ta bin cu ne pa atende un caso asina lo por resulta pio cu e mesun malesa.
E ley aki ta un punto di debate, caminda Mediador di Gobierno Anselmo Pontilius ta haya cu ta bale la pena cu e partidonan, dunadonan di trabou, sindicatonan, y gobierno sinta hunto y debati si e ley aki mester di cambio si of no. “E ta puntonan cu mester di discusion.” Mientras cu abogado di sindicato FTA Hose Figaroa ta haya cu e ley ta traha, pero mester di mas supervision prome cu e baca hoga. E situacion di Aura Casino y di otro companianan manera Señor Frogs ta casonan cu mester tene na consideracion pa no ripiti mas, treciendo un situacion dificil pa e trahadonan. Esaki ta e reflexion cu tanto abogado Figaroa como mediador Pontilius a trece dilanti, pero cada un di nan for di nan propio perspectiva.
Abogado di FTA
Abogado Figaroa a haci referencia na e operado inicial di Aura Casino na ex Occidental hotel (Barceló hotel), caminda e compania a coy nan cosnan y nan a bay sin laga nada atras. E ta bisa cu tin leynan manera 1615db di Codigo Civil, pero tin biaha ta wordo presenta situacion cu no ta duna bo mucho espacio pa haci mucho cos rond di dje. Pues nan por cuminsa cu casonan y gana casonan, pero e problema ta sinta unda bo ta bay saca bo placa. Ambos companianan den belasting so tin miyones cu nan a keda sin paga. Si den caso cu nan como sindicalista ta pone confiscacion riba e companianan aki cu nan demanda di 500 mil of 600 mil florin; mientras di otro banda nan tin gobierno cu tin un clean di un par di miyon. “Ta unda bo ta haya bo placa?”
E ta haya cu e articulo 1615db di Codigo Civil riba su mes no ta malo –segun e abogado di FTA- pero e mala fe di e dunadonan di e tipo di companianan aki, unda simplemente nan a crea un buraco di debe den tur caminda y tambe cerca e trahadonan, y despues nan a bay manera nada. “Eynan no ta e ley a faya, eynan esunnan cu mester a zorg pa wordo cumpli cu e ley, nan a faya.” E articulo aki ta stipula cu den caso di un ‘overgang’ (traspaso) di un empresa, di un dunado di trabao pa otro, pa ley (‘van rechtswege’) e obligacionnan pa cu e trahadonan ta pasa pa e dunado di trabao nobo cu ta bay opera e empresa.
Den e caso aki no por keda sin mustra –segun abogado Figaroa- den direccion di gobierno ya cu mayoria di e compania e prome señal cu ta mustra cu nan ta bay malo ta na momento cu e compania ta stop di paga belasting y otro compromisonan manera SVb, AOV, etc… Den e caso aki normalmente e ultimo caminda cu e compania ta bay corta ta cerca e trahadonan mes, ya cu si nan no ta paga e trahado, e trahadonan no ta paga.
Falta di pago di belasting un señal clave
Na nivel di cumplimento di pago di belasting ta e prome señal cu un compania ta bayendo mal. Y si gobierno ta cuminsa monitor y controla cu algo no ta bayendo bon cu e compania ya cu no ta cumpliendo cu su compromiso fiscal, nan por evita cu e problema por scala mas. Ya cu e negligencia aki ta crea cu e compania ta crea un debe astronomico di belasting. Mientras cu e trahadonan su speransa ta minimo a pesar cu e por gana tur caso den corte, ya cu dificilmente e por saca un florin for di e situacion aki. Otro situacion tin di haber ora cu otro compania kier tuma over y ta e caso pa ehempel na Aura Casino, ya cu un compania Canades ta interesa pa opera e casino bek. Abogado di FTA a laga sa cu nan rol como sindicato tabata pa purba mas tanto posibel pa e trahadonan por mantene nan derechonan manera ley ta prescribi. Di banda di FTA su abogado a declara cu lamentablemente e situacion di incertidumbre di e trahadonan no a dura danki na e sindicato “pasobra sindicato hopi luna pasa tempo cu e atraso di pago tabata simplemente cuater luna di salario”, a mustra boluntad pa negosha. Ya cu e tempo ey, FTA a sinta cu representante di e operado nobo, pero nan no kier paga cuater luna. Awor e sindicato por compronde cu 12 luna despues, e compania aki ta dispuesto pa paga cuater luna. “Si e tempo ey bo a paga cuater luna, bo a paga net e cuater luna cu e hendenan tabata na cas, tur hende por a sigui sin niun problema”, e abogado a bisa.
Mediador di Gobierno
Di su banda, Mediador di Gobierno Pontilius ta bisa cu awendia mundo di casino tin su propio retonan. E ta considera cu minister di Labor lo mester haya un analisis completo con pa preveni loke ya a pasa cu Aura Casino y Sr. Frog. Pero tambe a yega di pasa varios biaha den cual operadonan cu no ta serio, ya cu no ta cumpli cu nan obligacion legal, ta opera un casino y e consecuencia ta pa e trahadonan. E ta considera cu mester bin cambio den e maneho di esunnan cu tin e licencia pa opera e casino, entre nan mester di un hotel di 400 camber cu ta sostene esaki. E ta kere cu un di e formanan cu por yuda scapa un poco di e iresponsabilidad di un di e operado ta, cu esun cu ta carga e licencia ta para finalmente responsabel pa esaki. Pero tambe mester tin un vigilancia mas di cerca di e cumplimento di e dunado di trabou. E ta bisa cu ademas di sector casino tin otro sectornan cu mester vigila di cerca. E aspecto aki ta demanda atencion y mester tene cuenta cu ne e aña aki. Pasobra ultimo tempo nos na Aruba ta hayando demasiado impacto di un sector casino cu riba su mes nan mester sa cu tin hopi competencia, pero principalmente cu lo por proteha e trahadonan miho. Encuanto e ley of articulo nobo 1615db di Codigo Civil, Mediador di Gobierno a haci un reflexion con esaki ta den practica. Den e caso di Aura Casino, aunke e compania cu tabata opera, e casino aki a wordo manda den bancarota. Mientras cu e operado nobo ta haya cu nan no mester asumi e responsabilidad completo.
2.5 miyon debe na belasting
El a bisa cu e ley aki tin su origen, ya cu el a pasa henter un proceso pa finalmente el a wordo aproba den Parlamento pa atende cu operadornan di casino cu no ta serio pa no abusa di un sector laboral. “E no ta un ley desconoci. Na Hulanda tin un ley similar.” Sr. Pontilius ta declara cu ta bon pa sa cu e compania cu a wordo declara bancarota tabatin un debe di 2.5 miyon florin na belasting. “Bo ta puntra bo mes con esaki ta posibel!”, e ta bisa Bon Dia Aruba. E situacion aki ta ilustra cu un pais avansa manera Aruba no por tin espacio pa presenta e tipo di situacion aki. Pero den sintesis, Mediador di Gobierno a laga sa cu den general tin un acuerdo pa habri ex Aura casino cu 26 trahado. Mientras cu un grupo di 18 trahado cu ta resta, algun di nan a bay di acuerdo pa acepta e cuater luna di salario cu e operador nobo a ofrece y nan no ta bay corte. Mientras cu e otro grupo no a acepta niun placa wardando e veredicto di e hues, eventualmente e luna aki.
