Grupo di sindicato ta bay den accion awe mainta contra prestatiemanagement

Ayera merdia sindicatonan a reuni un biaha mas cu prome minister Evelyn Wever-Croes y otro minister, manera nan a sigura, pa asina trece dilanti nan preocupacion y solicitud pa stop e ley di Prestatiemanagement. Nan a sigura cu awe mainta 8or nan ta bay den accion.

Despues cu e grupo di sindicato conforma pa Seppa, Simar, SADA, FTA y SPA a sali di e reunion, nan a para pafo di Bestuurkantoor pa asina Edward Maduro, presidente di Sindicato di Aduana di Aruba (SADA) trece nan punto dilanti y nan frustracion pa cu e Landsbesluit Prestatiemanagement cu a bin na vigor dia 1 di januari 2023.

Nan si ta di acuerdo cu un tipo di prestatiemanegement mester bin, debi cu den Landspakket ta poni cu mester bin cu un manera pa aumenta e productividad y eficiencia di aparato publico. Maduro a sigura cu nan ta den contra den e manera con esaki a wordo ehecuta.

“Bo ta di acuerdo cu mester bin cu un manera pa midi e prestacion, pero nos toch tin cu keda cu e parti cu bo tin cu cuida e derecho di bo miembronan y trahado,” el a bisa.

Nan ta di pensamento cu den ley tin hopi ‘mancamento’ na unda cu nan ta señala cu “si e ley aki ta sigui cana manera cu e ta bay, ta bay tin problema hopi grandi pa e clase trahado, e ambtenaarnan, pa motibo di e manera con esaki a wordo hinca, cu a facilita, por ehemplo, un retiro di e ambtenaarnan. Un retiro semper tabata wordo regla den LMA, pero e LMA no tabata duna libertad pa bo kita hende manera bo kier. Bo tabatin proteccion cu bo mester tin motibonan valido y contundente pa bo kita un hende di trabao. Y aworaki esey no ta e caso mas,” Maduro a señala.

Despues di manda varios carta sin cu nan haya oido y di haci varios intento pa yega na mesa cu ministernan pa nan hunto por traha algo, manera Maduro a expresa, nan a dicidi di tuma pasonan pa pone presion.

Ayera nan a manda un carta indicando cu awe mainta nan ta bay tin un accion na unda nan ta yama nan trahadonan, miembronan, “tur esnan cu ta preocupa cu nan trabao” pa yega na Wilhelmina Park y despues nan lo entrega un manifiesto na prome minister “pasobra e ley aki mester wordo ingetrokken, mester drecha e ley akinan pa no haci abuso di esaki.”

Di loke ta trata e reunion di ayera cu prome minister y otro ministernan, Maduro a sigura cu “no tabatin mucho consenso pa asisti di parti di e bloki sindical pero nan a asisti na unda “lamentablemente nos a mira un set politico usando sindicato,” di esaki el a referi na sindicato TOPA e cual nan a pone den duda pa participa den bloki aki segun Maduro a bisa, “lamentablemente e sindicato aki tin otro directiva pero e realidad ta otro y nos por wak cu nos tin e mesun tipo di sindicato cu pa añanan a boicotia e trahado.”

Bon Dia Aruba a tuma contacto cu sindicato TOPA pa nan trece nan puntonan dilanti y splica pakico nan no ta forma parti mas di e bloki sindical aki pero te ciere di edicion aki redactor no a haya contesta.

Den un editorial di Bon Dia Aruba di dia 6 di januari tin un splicacion amplio di implementacion di e sistema prestatiemanagement e cual ta un sistema equitativo cu ta bay aplica na tur departamento y si ta posibel segun e mesun metodo tambe na organismonan semi-estatal.

Den editorial ta indica cu si ta analiza loke a trece dilanti te awor, por mira cu e decreto a base di cual lo bay actua, ta regla e proceso di intercambio cu e empleado, desde e momento cu ta planifica na inicio di aña kico lo ta e tareanan/trabao di e persona, mas e evaluacion intermedio y final den cual ta haya un vista total di loke ta e prestacion di e persona. Y despues di esaki, tambe e consecuencianan cu evaluacion, sigur den caso negativo, ta bay tin.

Cu esaki, gobierno por fin ta introduciendo un manera di atende prestacion cu ta practica comun na varios entidad semi-gubernamental y tambe na hopi empresa den sector priva, tambe ta pone fin na e practica unda na varios departamento no tabatin evaluacion structura, sino cu un persona cu ta haya cu e mester un ‘bevordering’, ta bay busca ayudo di otro persona pa yena un formulario, poniendo aden loke nan mes ta haya corecto. Despues un autoridad desconoci ta huzga si o no, si e peticion pa promocion ta termina den exito. E manera retrogado aki di, basicamente, no evalua empleado, porfin a yega na su final.

E decreto ademas ta habri e posibilidad pa cuminza e trayecto di retiro di un empleado publico, si su cumplimento ta bao nivel pa tres aña consecutivo. Den esaki ta tene cuenta cu loke ta stipula den articulo 98, inciso 1, sub f, cu ta trata e posibilidad di retiro pa incapacidad o ineptitud pa eherce e puesto den cual el a funciona, si no ta trata di deficiencia psicologico o corporal. Esaki ta sigur un ampliacion serio di e posibilidad pa deshaci di persona cu no ta funciona den e aparato. Claro cu esey mester tuma lugar cu e cautela y seriedad necesario, pero e ta significa un avance importante den direccion di maneho di personal mas parecido na loke den sector priva ta normal caba, desde antaño.

Den conferencia di prensa di ayera redactor di Bon Dia Aruba a haci e siguiente pregunta: “e decreto ta habri e posibilidad pa cuminza trayecto di retiro di un empleado publico si su cumplimento ta bao nivel pa 3 aña consecutivo, esey no ta algo positivo pa boso?

Di esaki, Maduro a contesta cu “sindicatonan semper ta para contra e manera con e retiro a wordo regla den ley aki, e retiro di ambtenaar ta regla pa decadanan caba den un ley cu ta yama LMA, prestatiemanagement mester a bin pa hisa e productividad di e eficiencia di aparato publico, e motibo pakico a bin cu un prestatiemanagement no ta pa kita hende di trabao, pasobra esey tabata den e tools caba pero door cu gobierno no ta sincero y no por sali aki afo y para den su sapato y bisa cu nos tin cu kita hende, nan ta sconde tras di un cortina cu ta yama prestatiemanagement,” el a bisa.

El a referi cu gobierno ta mal usando e ley aki pa kita hende di un manera mas facil compara cu e ley LMA “kiermen na ningun momento bo mester a bin cu un ley di retiro den esaki pasobra esey no ta e bedoeling cu lo cual ta poni den landspakket.”

Sinembargo, si un trahado no ta cumpli cu e nivel di trabao rekeri den tres aña consecutivo “esey ta e parti di prestatiemanagement, bo tin cu dunel’e hermentnan pa e drecha su mes, Raad van Advies ta bin cu hopi punto den su conseho na gobierno unda ta desbarata e punto akinan, pa yega di kita hende siendo cu bo dunado di trabao no ta zorg pa bo bin cu cursonan pa e trahado, mañan nan ta bin bisa bo, a bo como trahado no ta funciona, pero ki abo como dunado di trabao ta haci pa yuda mi.”