DBZ (Departamento di malesa contagioso) a tene nan siman di vacuna pa inyecta tur persona cu ta cay den e grupo di riesgo y riba 60 aña di edad, cu por haya griep y desaroya complicacion.
Arnelda Els, verpleegkundige di Departamento di Malesanan Contagioso, a duna di conoce cu nan departamento a pone diferente ‘prikposten’ pa asina persona di edad avansa tin e facilidad pa yega na e localidad pa haya e vacuna di influenza.
Nan proposito ta pa hende riba 60 aña di edad acerca cu nan carchi di AZV y hende cu ta abou di 60 aña di edad cu ta cay den e grupo di riesgo mester bin cu receta di dokter cu AZV, ya cu ‘nos no por bende e vacuna’.
A puntra Els pakico e vacuna ta importante. E ta conecta cu ta pasobra un persona 60+ ta vulnerabel ora nan haya griep, por desaroya complicacion manera bronkitis, pulmonia y por para na hospital. “Den pasado nos a haya cu mester a manda hende afo pa haya tratamento medico. No tabata pasobra hospital no por atende, djis cu no por a handle e cantidad halto cu a bira malo. Cu e capacidad di hospital a yena.”
Nan kier evita cu e grupo di riesgo haya influenza. Sinembargo, un persona cu haya vacuna no ta nifica cu e no ta haya griep. Den e prome aña, e ta hay’e, pero locual ta evita ta cu e persona haya complicacion.
E ta baha e cantidad di tempo cu e persona ta bira malo y ta baha e sintoma, pues ‘e persona ta bira menos malo’. Segun hende ta haya pa aña, e griep ta bira menos, pero e pashent tin cu tum’e cada aña.
A pasa tambe pa casnan di anciano priva pa duna hende grandi e vacuna. Na SABA, nan a haya e vacuna di nan mes, y tin algun dokter cu tambe a busca stock pa asina vacuna nan pashent cu ta cay abou di e grupo di riesgo.
Pashent cu ta cay den e grupo di riesgo por check cerca nan dokter di cas, pa por haya nan vacuna den consultorio. Si no a busca ainda, e vacuna ta valido te cu augustus 2020. Els ta bisa cu ta recomendabel pa un biaha cu haya e vacuna, keda tum’e tur aña.
“Tur aña e vacuna ta valido pa un aña. Pa motibo cu e ta a base di e influenza cu ta circula den e temporada cu a pasa. Virus ta un malesa cu ta keda cambia. Hende cu ta sufri por ehempel asma, malesa cronico, diabetes, presion halto, hende malesa cu auto-immune, lupus, HIV mester di e vacuna, pero semper consulta cu dokter prome si por tume”, el a splica.
Tambe hende cu problema respiratorio COPD, bronkitis cronico y hende muhe na estado y muchanan chikito. Esunnan bou di 60 aña di edad mester bay dokter di cas of nan specialista pa haya recomendacion pa por haya recept y por tin e vacuna.
Pa informacion ta puntra cada persona si nan ta alergico na cualkier producto manera webo, of antibiotica penicilline, cu e ora nan no por haya e vacuna. Nan mester puntra si nan ta alergico na cualkier producto of antibiotica. Di eynan tambe nan ta dicidi si por haya e vacuna, lo check si tin algun otro condicion medico a base di kico e dokter ta bisa.
