Ayera atardi un grupo di hende muhe empodera y profesionalnan den diferente area a uni pa trece dilanti informacion tocante varios actividad cu nan ta bay haci den luna di maart pa loke ta trata Dia Internacional di Hende Muhe.

Joase-Ann van der Biest di Muher Fabulosa conhuntamente cu Ana Maria Tromp Woman’s Empowerement Coach & Bounce, Sheelah van de Poel di Frida Kahlo Experience Art & Creativity Engine of the Heart, Indra Stamper Fabric Artist Recycle Art y Suzette Dumfries Certified Finacial Therapist & Wealth Advisor a reuni ayera atardi na Frida Kahlo Pop Up Experience ubica na Caya Grandi pa asina ey trece dilanti Women’s Month Uniting Women cu e obhetivo di celebra e Dia Internacional di Hende Muhe durante full un luna y no un dia so manera normalmente ta wordo haci.

Nan a crea un programa pa comparti nan conocemento, amor, compasion, creatividad pero tambe duna na e hendenan muhe di Aruba crea un herment pa nan mes por yega na nan meta y vision manera van der Biest a menciona.

E intencion ta pa nan yega mas cerca di hende muhe cu pa algun biaha nan no ta haya e oportunidad pa loke nan tin pa ofrece den e actividadnan aki.

Van der Biest ta esun encarga di haci Muher Fabulosa Live Podcast Sessions tur dialuna na unda su persona cu e audiencia y un panel di profesionalnan di hende muhe cu historianan real ta bay comparti nan experiencia via e podcast “cu hendenan muhe di Aruba cu mester di mas inspiracion y cu kier conta tambe nan historia pa wak di ki forma hunto den e sesion aki nos por yega na un solucion of nos por contribui na algo mas bunita,” el a bisa.

Sheelah van de Poel di Frida Kahlo Experience Art & Creativity Engine of the Heart e cual ta un galeria, a señala cu Frida Kahlo tabata un hende muhe cu hopi energia na unda cu tur diabierna nan ta bay reuni cu e grupo di hende muhe cu diferente actividad pero enfoca den arte “pasobra creatividad ta duna tambe energia, esey ta loke nos kier trece tur diabierna,” el a menciona.

Ana Maria Tromp Woman’s Empowerement Coach & Bounce a uni na iniciativa aki cu e pensamento cu lo ta great pa tur hende muhe uni pa yuda otro hende muhe pa nan por sinti nan mes mas empodera, Tromp ta bay ta e persona encarga di duna un tayer ‘Boundry Queen One and One’ e cual ta un topico cu segun el a sigura “e mayoria di hende muhe ta presenta dificultad cune por ehemplo con pone limite, show up pa su mes di un manera cu no lo sinti cu e culpa ta mat’e mes y e idea ta cu durante e dos parti di e tayer nan por sali cu mas conocemento di nan mes, como pakico esey ta molestia nan of con pa nan haci’e pero tambe con pa nan por pidi pa lo cual nan kier, esey ta e idea.”

Suzette Dumfries Certified Finacial Therapist & Wealth Advisor a señala cu el a scoge pa e luna aki di ofrece servicionan di terapia financiero, esey ta nifica cu ora nan ta bezig ta empoderando un hende muhe pa siña con pa crece, sostene y preserva rikesa, hopi biaha nan ta enfoca ariba e parti di cuanto presupuesto mester tin, unda tin cu inverti y con tin cu spaar, “lo cual nos ta haci den terapia financiero ta literalmente wak cua ta e parti psicologico y emocional, tambe e parti di comportacion cu mester wordo adapta pa asina realmente por realisa e metanan financiero cu bo por tin,” el a expresa.

Dumfries ta bay duna e terapia aki tur diaranson na unda e mes a comenta, nan ta bay hopi intensamente den e proceso con libera di emocionnan, forma di pensa, perspectivanan cu ta stop e persona di loke e kier logra cu financieramente e tin derecho di logra.

Di su parti, Indra Stamper Indra Stamper Fabric Artist Recycle Art a trece dilanti cu den pasado el a yuda varios famianan den necesidad den e parti di parti cuminda y awor e ta kere cu comunidad mester di asistencia pa e arte di reciclahe, pa esaki e ta trece un les ‘Vision Catcher’ di crea ‘dreamcatchers’ cu material recicla cu mester wordo traspasa na e muchanan.

“Reciclahe ta na moda pero falta un link pa yega na esaki,” Stamper a bisa.

El a conta cu cada un di su dreamcatcher cu nan lo bay crea lo bay incorpora un cristal di Franse Pas “pasobra eynan hopi indjan a muri y mi ta kere nos mester mantene nos historia, den cualkier arte cu nos por incorpora Aruba, incorpora algo asina grandi cu ta nos indjannan, incorpor’e pa nos pas’e over na nos muchanan jong, asina nos ta crea un energia bunita y un arte cu ta conoci y ta hopi na moda tambe, e les di Vision Catcher ta manera un soño cu bo tin y bo no por usel’e solamente como un dreamcatcher lo cual nos ta conoci cune, sino crea un vision, pa pone bo soño, pone kico bo ta prensa y kico bo kier logra den e dreamcatcher,” el a splica.

Di loke ta trata e programa, nan a indica cu tur dialuna di luna di maart ta bay tin e podcast di Muher Fabulosa, tur diamars nan ta bay duna lesnan di Yoga y holistico, tur diaranson lo tin terapia financiero, diahuebs lo tin e tayer di Boundry Queen One and One, diabierna ta Frida Friday’s y diasabra lo tin lesnan di arte, deporte mainta trempan y Indra cu e sesion di Vision Catcher.

Pa personanan interesa pa participa den esaki, registracion ta bay habri dialuna awor 27 di februari unda e link lo wordo comparti riba e rednan social di cada un di e profesionalnan aki.