Na Aruba tin un poblacion basta grandi di migrantenan cu a bin for di diferente paisnan rond di mundo, ta p’esey cu Aruba ta wordo considera un isla multicultural, e mayoria ta migrantenan di paisnan di Latino America cu pa diferente motibo a bin haci nan bida na e isla aki.

Segun Agencia di Nacionnan Uni pa Refugiado (Acnur) aproximadamente 16% di e poblacion total na isla di Aruba ta forma pa migrantenan Venezolano, e situacion aki tambe ta igual na Corsou, e isla ruman cu ta conta cu 157.000 habitante y 10% di e poblacion ta ekivalente pa migrantenan Venezolano.

Acnur y Organisacion Internacional pa Migracion (OIM) ta calcula cu pa e aña aki e cifra di migrantenan por yega te 8,13 miyon cu a sali huy di e crisis social, politico y economico cu e pais bisiña ta bibando na e momentonan aki.

Ta importante pa destaca cu den diferente campañanan politico e poblacion Latino na Aruba semper tabatin un influencia y tambe a wordo treci dilanti promesanan cu por a mira cu esey no a wordo cumpli.

Un di nan tabatin di haber cu amnistia pa migrantenan e cual tabata papia di reunificacion familiar, permiso di trabou y proyectonan di integracion pa personanan migrante, dos aña di duracion pa cada un di nan y asina kita nan e miedo di exportacion, esaki tabata un promesa cu hopi Latinonan a kere y a confia cu nan lo por a haya si nan tabata vota pa e partido MEP.

Dianan pasa, den un medio di comunicacion Latino na Aruba a wordo treci dilanti un entrevista cu prome minister Evelyn Wever-Croes na unda el a pidi disculpa na e comunidad Latino di Aruba pa diferente motibo.

“Na nomber di Gobierno di Aruba y na nomber di Partido Electoral di Pueblo mi ta pidi disculpa pasobra esey ta un di e problemanan cu nos no por a wordo soluciona ainda, lamentablemente nos no por bisa hopi di loke ta trata DIMAS cu ta di otro partido cu ta pertenece pa e coalicion pero nos a purba, nos no tabatin tempo y e pandemia a yega na e momento ey cu nos no por haci loke nos kier a haci, p’esey cu tur humildad mi ta pidi disculpa”, Wever-Croes a menciona.

Pa cu esaki, un grupo di personanan di e comunidad Latino na Aruba a haci un declaracion na unda nan ta rechasa e disculpa di prome minister, Wilson Antequera persona cu a papia den representacion di e grupo aki a expresa cu nan no a bin dilanti pa papia di temanan politico ni representando ningun partido, sino pa informa como ciudadano comun riba e mal contento cu a ocasiona e palabranan cu prome minister a ofrece algun dianan pasa.

“Awor si nan ta corda riba e pueblo Latino, cu awor si nos por conta cune y pa mi personalmente no ta kere di loke el a bisa, cu e no a haya e tempo pa nos y awor si e kier conta cu nos”, el a declara.

Tabatin hopi promesa cu no a wordo cumpli, specialmente e trato pa nan segun loke Antequera a expresa cu nan ta tira e responsabilidad pa otro gobierno na unda “a bo ta e prome minister encarga cu mester sa kico ta pasa cu e pueblo Latino”, Antequera a bisa.

Tambe el a comenta cu loke nan tabata kier ta pa gobierno por a tuma nan den cuenta y tin respet pa nan, “pa nos ta insulto di tuma nos como ignorante y bisa cu nos ta conta cune, cu a mi mes e no ta conta pasobra nos a ricibi hopi ofensa”, el a sigura.

Asina mes el a bisa cu di e promesanan cu tambe nan a priminti tabata baha edad di pension y esey tampoco a tuma luga, genera empleo cu Citgo y habri refineria cu tampoco a wordo cumpli.

Den termino di Husticia, Antequera a menciona e maltrato y aglomeracion di hende cu tabatin na Guarda Nos Costa y awor cu e salida di e vuelo humanitario nan no a pone enfasis riba e problematica cu a presenta cu e ultimo vuelo.

Pa finalisa, el a manifesta cu awor cu eleccionnan ta na caminda y cu algun promesanan pa comunidad Latino ta bin dilanti un biaha mas, el a recomenda pa e comunidad di migrantenan aki “pa vota consciente y cu partido MEP no ta e miho alternativa pa e pueblo Latino”, Antequera a sigura.