Tin un malcontento ta reina bao di un grupo di persona cu su bishita casino regularmente. No solamente pa hunga na mashin of mesa, pero esnan cu ta bet riba diferente tipo di competencia. Pa e wega di awe di Spaña contra Georgia e oddsnan tabata bon pa bet riba Spaña y hopi hende a hacie.
E bet ta riba Sports Parlay. Hopi hende a tira nan bet for di diabierna caba, sperando riba e wega di diadomingo.
Despues cu e resultado a bira conoci, y ganadonan a cuminsa yega pa cobra, a resulta cu no ta paga nan manera mester ta. Personanan cu papel ta bisa cu nan lo haya casi 500 dollar si nan gana, a resulta cu casino local kier paga nan bao di 100 dollar.
Di repente, despues di e wega, ta splica e ganadonan cu e Sistema a haci un fout y nan no por paga e suma cu ta skirbi riba e papel. E pregunta cu e hungadonan tin ta di con no a avisa nan for di diabierna y a bin informa despues di e wega y ora cu e ganadonan a cuminsa bay cobra. E ora si di repente ta manda e-mail pa tur e hungadonan.
E situacion aki tin hopi persona cu ta bet rabia y ta exigi pa haya e placa cu a palabra cu nan lo gana. Si e casino, of esnan responsabel a hinca informacion robes mes, esaki no ta problema di esnan cu a bet. Segun un ciudadano rabia.
Tin di e grupo aki hasta ta evaluando e pasonan cu ta bay tuma, pasobra tin hende mester a gana algun mil dollar.
