Ya for di oranan di trempan awe mainta, un grupo di persona a aglomera dilanti oficina di DIMAS. E motibo di esaki ta cu nan ta buscando manera pa haya status di refugiado pa asina haya asilo, tumando na cuenta cu diadomingo awo lo tuma luga eleccion na Venezuela.
Un ciudadano ta comenta na Bon Dia Aruba (wak e video completo aki) cu no obstante cu Venezuela ta un pais rico, tin hopi hende pasando hamber y ta muriendo pa falta di medicamento. “No es husto”, e homber ta bisa. E ta splica cu nan ta bandona nan pais pa bin traha entre otro na Aruba, pa asina nan familiar por a lo menos haya algo pa sobrevivi.
E ciudadano ta splica tambe cu e Consul Venezolano no ta ‘haci nada pa nan’.
DIMAS
For di un trahado di DIMAS nos a comprende cu ya caba desde ayera tin hende yegando cercanan pero hopi nan no por haci. Segun e trahado (kende a prefera keda anonimo) cu tin un formulario cu nan ta haya, esaki mester wordo yena y debolbi den 24 ora pa e proceso por cuminsa. “E ora ey nan lo bay den un proceso di screening pa wak si nan ta bin den remarke pa e status cu nan ta pidi.
“Locual cu mayoria di nan kier ta pa e consul habri pa nan por vota aki”, e trahado ta bisa.
Bon Dia Aruba ta den proceso pa haya contacto cu directora di DIMAS Kathy Ruiz-Paskel pa haya un declaracion oficial di e departamento.
Gobierno
Awe mainta pa 8.30am tin un conferencia di prensa programa relaciona cu e tema aki, na unda prome minister Evelyn Wever-Croes (MEP) lo mester splica kico exactamente lo mester pasa.
Ya caba pa algun siman Bon Dia Aruba ta riba e tema aki y por conclui cu te na e momento aki no tin niun claridad riba kico ta e maneho exacto pa esaki, kico ta e placa aloca pa un ‘calamidad’ eventualmente y unda tur e luganan di asilo ta.
Mas aki rato Bon Dia Aruba lo trece mas informacion. Por sigui nos pagina di Facebook https://www.facebook.com/bondianoticia pa keda al tanto di tur proceso.
