Grupo criminal di Brasil conoci manera Prome Comando di Capital (PCC) ta recluta miembronan di Forsa Arma Revolucionario di Colombia (FARC), cu e meta di amplia su poder di narcotrafico den Latino America, The Wall Street Journal a informa. E corant Mericano ta menciona algun investigacion y dato cu a wordo entrega pa funcionario di Colombia y di Brasil. Nan a bisa cu persona cu a wordo recluta ta militarnan di grupo arma di Colombia cu no ta di acuerdo cu proceso di paz cu gobierno di Juan Manuel Santos ta lidera.
PCC ta ofrece cupo di trabao na FARC
PCC ta duna trabou na guerrillero di FARC”, Minister di Defensa di Colombia, Luis Carlos Villega a bisa den un paraaf di noticia di The Wall Street Journal. E tema aki a wordo analisa pa funcionario di ambos pais den un reunion na Manaos, amazona di Brasil. “Ta existi algun hende cu ta contra di FARC , cu no dispuesto pa drenta den proceso di paz y tin temor, cu hustificacion of no, cu por existi posibilidad cu parti di arma cu FARC tabatin por move pa nos ciudadnan”, Raul Jungmann, minister di Defensa di Brasil a bisa den un conferencia di prensa na Brasilia.
Segun The Wall Street Journal entre 5% y 10% di integrante di Farc no kier acepta e acuerdo di paz ey, cu gobierno di Colombia a firma na La Habana, Cuba.
Si guerrilleronan a wordo contrata realmente pa PCC, anto tur esfuerso di gobierno di Colombia pa logra mobilisacion di miembro di FARC ta na riesgo y por sucede cu grupo criminal di Brasil por tuma poder y teritorio den Colombia, The Wall Street Journal a agrega.
Lincoln Gakiya, ta un fiscal cu ta investiga durante 10 aña e grupo PCC. E ta pensa cu e organisacion criminal aki ta purba di haya rutanan di trafico ilegal na Brasil, cu awo ta controla pa otro gruponan, y asina purba di traha directamente cu persona cu ta bende cocaina na Colombia.
