Dialuna atardi, e team di Ministerio di Desaroyo Teritorial, Infrastructura y Medio Ambiente tabatin e grato honor di por a sinta cu Minister Plenipotenciario di Washington, Joselin Croes, conhuntamente cu su consehera. Den e reunion sumamente interesante y fructifero aki, e team di Ministerio por a informa y duna presentacion pa loke ta diferente proyecto andando riba diferente tema cu ta concerni dicho Ministerio.
Conhuntamente cu Croes a papia di diferente oportunidad pa colaboracion cu diferente instituto y instancianan na Merca, segun un comunicado di gobierno.
Croes a informa cu pa locual ta temanan di medio ambiente y desaroyo teritorial, tin hopi oportunidad pa colaboracion y tambe hopi interes den Aruba. Siguramente por indica cu e trabounan di Aruba no a keda sin wordo nota riba plataforma internacional, ya cu instancianan manera Banco Mundial y IMF ta mustra hopi interes den e pasonan cu Aruba lo tuma pa locual ta un futuro duradero, segun e comunicado.
E ministerio en cuestion a duna informacion, no solamente pa locual ta e proyectonan y nan contenido, pero tambe di oportunidadnan y retonan cu dicho Ministerio ta consciente di nan. Conhuntamente a yega na palabracion y sigur lo continua cu e colaboracion y comunicacion estrecho entre e ministerio y e oficina di Minister Plenipotenciario, pa asina por crea proyectonan duradero cu ta beneficia nos pais, cu enfoke riba un futuro duradero, e comunicado a finalisa.
