Ayera tardi a tuma luga un rueda prensa yama pa un grupo di mayor cu kier vocifera nan preocupacion y ta bisa ta basta na e introduccion y imponencia di ideologia di genero den educacion na scol.

Cindy Lacle, un di e mayornan preocupa, a resalta na inicio cu e rueda di prensa y nan preocupacion no tin nada di haci cu religion y tampoco tin nada di haci cu discriminacion contra e comunidad di LGBTIQ+

El a aclaria cu como mayor nan kier enfatisa y establece cu nan ta acepta y respeta decision di cada persona y decision di cada persona pa cu nan cas. “Ta hopi importante pa compronde cu tin un diferencia grandi entre acepta y ta di acuerdo cu un persona. No pasobra nos ta acepta kiermen cu nos ta di acuerdo y no pasobra nos no ta di acuerdo kiermen cu nos tin odio pa e persona.”

Lacle a señala cu e proposito di scol ta pa educa un mucha ariba diferente materia, pa dun’e habilidad y herment pa e dia di mañan e por haya un trabao, e por funciona den su trabao, pa e por sostene su mes financieramente, pa e por contribui na comunidad y tambe na su pais.

Grushenka Arends, otro miembro di e grupo di mayornan preocupa, a sigui splica cu e muchanan ta bay scol pa ricibi educacion, pa nan desaroya nan cerebro, pa e docente yuda nan den materianan manera matematica, historia, conocemento general, diferente idioma, tur locual ta basa ariba naturalesa obhetivo.

Naturalesa obhetivo, Arends a indica, ta tur locual cu tin di haci cu naturalesa. El a remarca cu educacion na scol mester ta basa ariba tur locual cu ta naturalesa obhetivo y cu na ningun momento ta e deber di un educador, di e scol, di un maestro of maestra pa educa e muchanan ariba e ideologia di genero, cual ta un ideologia subhetivo.

Ideologia subhetivo ta basa ariba un creencia cu no tin nada di haci cu lo natural. Arends a sigui splica cu religion, por ehempel, ta un ideologia subhetivo, pues un persona musulman ta lanta su yiunan cu un creencia, cu un pensamento, un catolico ta lanta su yiunan cu un pensamento diferente, mescos cu un cristian, un ateista, e ta locual cu e mayor ta dicidi pa su cas y con e ta dicidi pa lanta su yiunan.

“E ideologia di diferente genero tambe ta totalmente subhetivo y no ta basa riba e natural. Un mucha muhe ta nace cu un vagina, un mucha homber ta nace cu un penis, locual e ta scoge pa sinti segun e ta crece, locual e ta sinti pa ta, ta keda na e mayor na ki momento nan ta educa nan yiu riba loke ta temanan subhetivo”, el a resalta.

E mayornan aki ta para fuerte ariba e punto principal cu temanan subhetivo ta keda na e mayornan pa educa nan yiunan y no pa scol dicidi na ki momento nan ta bay impone y na ki momento na ta bay educa e muchanan riba e tema aki.

“Nos no ta manda nos yiunan scol pa nan wordo educa riba ideologia di genero. E ta algo cu simplemente nos no ta bay debati como mayor, e ta algo cu awe nos ta bisa ta basta y e ta algo cu como e duna di cuido primario di nos yiu nos no ta acepta”, Arends a enfatisa.

Nan ta subraya cu no ta e responsabilidad di ningun scol, mucho menos di un scol publico, pa impone creencia subhetivo of pa trece diferente creencia di religionnan pasobra esey no ta e motibo pakico nan ta manda nan yiunan scol publico.

El a splica cu un mucha no mag di core auto of bebe alcohol prome cu 18 aña pasobra nan no ta desaroya, nan no ta madura suficiente pa pak aan esaki. “Kico ta pone scolnan pensa cu nan por expone muchanan di 4, 5, 6, 7, 8 aña na creencia subhetivo?”.

Algun ehempel cu Arends a presenta cu a pasa na scol ta inclui lesnan di KDN na unda ta promove ideologia di genero, otro ehempel cu a pasa recientemente ta un ‘gender swap day’ (dia di cambio di genero). Esaki tabata un dia cu si un mucha muhe sinti cu e kier ta mucha homber, e mag di bisti na mucha homber y e mucha homber si e sinti cu e ta mucha muhe, e mag di bay scol na mucha muhe.

“No ta esaki loke nos como mayor ta scoge pa expone nos yiu na dje. Nos a bini hunto pa bisa ta basta, nos kier sa kico Minister di Enseñansa, Endy Croes, ta bay haci tocante esaki y kico e parlamentarionan ta bay haci tocante esaki”, el a remarca.

Por ultimo Arends a enfatisa cu como mayor nan no ta bay acepta cu nan ta impone ideologia di genero na scol y ta decision di cada mayor na ki momento nan ta haci esaki pa nan yiunan. “Nos ta lanta nos yiunan cu amor, nos ta siña nos yiunan respeta tur hende, nos ta siña nos yiunan acepta tur hende, pero esaki ta bira algo cu como mayor nos no ta acepta”.

E grupo di mayor a manda carta pa Minister di Enseñansa pa pone na altura di nan preocupacion y parlamentarionan tambe ta na altura di nan esaki. E grupo ta en espera di kico lo ta e contesta di Minister y Parlamentarionan y nan kier sa tambe kico ta e pasonan cu nan lo tuma pa cu e tema aki. Dependiendo di esey e grupo lo continua cu nan siguiente stap.