(AP) — Poblacion di Stacion Espacial Internacional (ISS) a aumenta na 11 diasabra ultimo, cu yegada feliz di e tercer capsula di tripulacion di SpaceX den menos cu un aña.
Esaki ta e grupo di mas grandi abordo di e stacion den mas di un decada.
Tur astronauta – representando Merca, Rusia, Hapon y Francia – a logra aparece riba camara pa un yamada di felicitacion di lidernan di nan agencianan espacial.
“Den e situacion dificil aki rond mundo, mi ta kere cu boso a trece curashi y speransa pa nos tur”, presidente di Agencia Espacial Hapones, Hiroshi Yamakawa a bisa for di e centro di control di vuelo di su pais, referiendo na e pandemia global.
Un capsula recicla di SpaceX transportando cuatro astronauta a yega ISS un dia despues di lansa for di Centro Espacial Kennedy di NASA. E capsula Dragon a mara di forma autonomo cu e outpost den orbita mas di 20 kilometer riba Ocean Indio. Tiki despues e porta a habri, uniendo tur 11 biahero espacial.
“Hombo, ta tremendo pa mira e 11 di boso abordo”, segun administrador encarga di NASA, Steve Jurczyck. El a nota cu esaki lo bira lo normal, awo cu SpaceX regularmente ta transportando tripulacion.
E personanan recien yega lo pasa seis luna na ISS. Nan lo reemplasa cuatro astronauta cu lo bolbe Tera abordo di nan propio capsula Dragon diaranson, pa termina un mision di mita aña. NASA deliberadamente a planea un superposicion breve pa asina e tripulacion saliente por orienta esnan cu a caba di yega.
Maske esaki tabata e tercer vuelo cu tripulacion di SpaceX pa NASA, tabata e prome pa usa un vehiculo cu a bula anteriormente, un parti esencial di un plan di fundador y CEO di SpaceX, Elon Musk, pa pusha na Luna y Mars. E capsula Dragon a ser usa pa e prome lansamento di tripulacion SpaceX mei ultimo, mientras e raket Falcon bulando diabierna a transporta dos persona na november.
Tabata prome biaha cu dos Dragon di SpaceX tabata para eynan na mes momento – practicamente banda di otro.
Tambe yegando e stacion: Thomas Pesquet di Francia y Akihiko Hoshide di Hapon. Ambos a yega di bay anteriormente, igual na Kimbrough. Pero tabata e prome bishita na e stacion pa McArthur. El a bula riba e mesun asiento y e mesun capsula – yama Endeavour – cu su esposo, Bon Behnken a haci den e mision di debut di SpaceX.
Pesquet – e prome Europeo pa bula riba un capsula di tripulacion comercial – a nota cu ISS a cambia desde su ultimo bishita cuatro aña pasa, cu mas hende y mas tipo di astronave.
E record historico ta 13 persona abordo, durante era di space shuttle di NASA.
E poblacion actual ta inclui seis Mericano, dos Ruso, dos Hapones y un Frances. E lo reduci cu cuatro persona diaranson, ora tres Mericano y un Hapones bay cas y aterisa den Golfo di Mexico.
NASA a usa companianan priva pa entreganan na ISS despues cu e shuttlenan a retira na 2011. SpaceX a cuminsa suministra transporte na 2012, mehorando su habilidadnan prome cu lansa astronauta y terminando dependencia di NASA riba Rusia. NASA tambe a contrata Boeing pa e servicio di taxi, pero no ta spera cu e Starliner di e compania lo transporta astronauta sino te proximo aña.
