(AP) —Ehercito Sur Koreano ta parce di kier recluta miembronan di supergrupo di K-pop, BTS pa servicio militar obligatorio, mientras e publico ta keda dividi tocante si mester duna nan excencion.
Lee Ki Sik, comisionado di Administracion di Recurso Humano Militar, a bisa legisladornan ayera cu ta “deseable” pa miembronan di BTS cumpli cu nan debernan militar pa sigura husticia den e servicio militar di e pais.
Anteriormente e siman aki, minister di Defensa, Lee Jong-sup a haci comentarionan casi identico tocante BTS na un reunion di comite parlamentario, y minister di Cultura, Park Bo Gyoon a bisa cu su ministerio pronto ta bay finalisa nan posicion riba e asunto.
Si e siete miembro di e grupo mester cumpli cu servicio militar ta un di e asuntonan mas cayente na Sur Korea, pasobra nan miembro di mayor edad, Jin, ta enfrenta posibel enlistamento na comienso di proximo aña ora e cumpli 30 aña di edad.
Bao ley Sur Koreano, tur homber bon di salud ta rekeri pa cumpli cu 18-21 luna di servicio militar. Pero e ley ta duna excencionnan special pa atleta, musico clasico y tradicional, ballet y otro bailarinnan cu a gana prijsnan top den cierto competencia pa eleva prestigio nacional.
Sin haci cambio den ley, gobierno por tuma stapnan pa otorga excencionnan special. Pero excencionnan den pasado pa hende cu bon prestacion den competencianan no-designa a genera debate serio riba e husticia di e programa.
Ya cu e conscripcion ta forsa hobennan suspende nan carera profesional of estudio, evasion di servicio militar of creacion di excencion ta un asunto altamente sensitivo.
Den un encuesta recien, alrededor di 61% ta sostene excencion pa artistanan manera BTS, mientras den otro, alrededor di 54% a bisa cu miembronan di BTS mester cumpli cu servicio militar.
Varios amienda na e ley di conscripcion cu por a habri caminda pa excencion di miembronan di BTS a keda introduci den Asamblea Nacional, pero legisladornan, altamente dividi riba e asunto, no a vota riba esakinan.
Lee, e minister di Defensa, anteriormente a bisa cu el a ordena oficialnan pa considera tene un encuesta publico pa yuda determina si ta duna exencion na BTS. Pero ministerio di Defensa despues a bisa cu no ta bay ehecuta un encuesta asina.
Na augustus, Lee a bisa cu si miembronan di BTS join ehercito, probablemente lo permiti nan continua practicando y join otro miembronan den exterior pa tour.
Hende cu ta ricibi exencion pa e conscripcion ta completa nan servicio militar despues di tres siman di training basico. Tambe nan ta rekeri pa cumpli 544 ora di trabao boluntario y continua sirbi den nan areanan profesional pa 34 luna.
