E 12 paisnan Latino Americano, cu na augustus a defini e gobierno di presidente Maduro como un dictadura, a afirma cu e crisis Venezolano a bira mas grave. Merca a haci un yamada na e regimen Chavista pa reestablece democracia.
E Conseho di Derecho Humano di Nacionnan Uni a mustra dividi riba e tema dialuna ultimo, entre e paisnan cu a denuncia e violacionnan grave di e libertadnan fundamental na Venezuela, y esunnan cu a critica e supuesto metemento di e organo aki den asunto interno Venezolano.
E comisionado di Nacionnan Uni pa Derecho Humano, Zeid Ra’ad Al Hussein, a presenta dialuna den apertura di e di 36 sesion ordinario di e Conseho su declaracion general encuanto e situacion di e libertadnan fundamental na mundo, den cual tabatin un enfasis special riba e crisis Venezolano.
Sr. Zeid a afirma cu e represion di e reciente protestanan anti gubernamental lo por constitui crimen contra humanidad, y a pidi un investigacion internacional independiente para clarifica loke a sucede.
Ambos comentario a keda rechasa pa e canciyer Venezolano, Jorge Arreaza, cu tambe dialuna a dirigi palabra na e pleno di e Conseho y a acusa sr. Zeid di ta gaña.
Diamars tabata turno di e paisnan pa responde e discurso di sr. Zeid y e sala a dividi entre esnan cu a defende sr. Zeid, di Jordania, su oficina y e resultadonan di e investigacion encuanto e situacion na Venezuela y esnan cu a acusa e comisionado di metemento den e asuntonan interno di e pais Suramericano.
E embahador Venezolano, Jorge Valero ta papia di ‘e comportacion selectivo, parcialisa y politisa di e alto comisionado contra Venezuela’ y a acusa e actua na servicio di Estadonan Uni.El a haya apoyo explicito di Cuba, Ecuador y Egipto, como tambe di e Grupo di Pais di Opinion Similar y e grupo di Nacion No Alinea.
Tur a rechasa e metemento di e Oficina di Alto Comisionado pa Derecho Humano (Acnudh) den asunto interno di Venezuela y e supuesto parcialidad di e organismo.
Den su turno di intervencion, Merca a limita su mes na denuncia ‘e escalada di violacion di derecho humano’.
“Nos ta haci un yamada na gobierno di Nicolás Maduro pa reestablece democracia y libera inmediatamente y sin condicion, tur preso politico,” e delegado Mericano a bisa, un solicitud cu tur esnan cu a interpela Caracas a haci.
Merca a apoya e declaracion di e Grupo di Lima, cu ta reuni 12 pais cu den augustus pasa a defini gobierno di Nicolas Maduro como un dictadura.
E grupo a bolbe tuma palabra ayera y a denuncia cu e situacion na Venezuela a bira mas grave den e ultimo simannan cu e decision di persigui e opositornan “cu a comparti nan kehonan cu comunidad internacional.”
“Estado Venezolano ta viola e normanan constitucional, e boluntad di pueblo y e balornan Interamericano, ta reprimi e disidencia politico y ta terorisa e poblacion,” e representante Paraguayo a bisa, cu a papia na nomber di e grupo.
