Grupo “Con Venezuela” ta convoca Venezolanonan na Aruba pa simulacro di eleccion

Diahuebs mainta, un grupo di Venezolano cu ta biba na Aruba a invita nan connancional pa awe diasabra presenta na Plaza Bolivar di Oranjestad pa un simulacro di votacion den marco di eleccion presidencial cu lo tuma luga dia 28 di juli.

Mirando cu campaña pa eleccion presidencial na Venezuela oficialmente a cuminsa dia 4 di juli ultimo, un grupo di Venezolano cu ta pertenece na organisacion “Con Venezuela” a informa tocante un convocatorio cu nan ta haci pa Venezolanonan residente na Aruba pa awe diasabra 6 di juli presenta na Plasa Bolivar pa asina haci un simulacro tocante e votacion pa dia 28 di juli.

Yris Acacio a señala cu nan ta bay splica con lo ta e proceso di votacion tanto di manera manual como di manera virtual ya cu ainda nan no tin informacion di ki forma lo tuma luga, “pa asina tur hende por haya sa kico e Conseho Nacional Electoral ta bay pone pa nos.”

For di 4or di atardi te cu 7or di anochi nan ta bay splica con ta bay ta e proceso di votacion pa 28 di juli.

E votacion mes pa Venezolanonan cu ta biba na Aruba no lo tuma luga na Consulado di Venezuela segun Acacio a menciona, nan ta bay haciele cerca den e mesun zona. Nan ta calcula cu 1,300 persona ta registra pa vota na Aruba.

Personanan cu tin paspoort Hulandes y paspoort Venezolano por vota, nan mester presenta nan cedula y cu esey tin derecho pa vota, no ta importa si e cedula a caduca.

“P’esey nos ta haciendo esaki pa nos convoca tur hende cu ta Venezolano y ta registra na Aruba pa vota pa por vota.” Acacio tambe a señala.

Nan tin ta sinti cu hopi speransa mirando cu nan ta apoya e candidato di oposicion Edmundo Gonzalez Urrutia ken ta esun cu ta representa e lider principal opositor Maria Corina Machado “ta nos candidato pa libertad y democracia.”

E inhabilitacion di Machado pa postula na funcionnan publico a ser considera como un di expresionnan mas explicito di Administracion di Nicolas Maduro ken ta e candidato di partido oficialista PSUV.

Expectativanan ta keda halto pa eleccion presidencial aki, maske tin dudanan tocante e transparencia den e proceso electoral.

Hunto cu Maduro y Urrutia, tambe tin 8 candidato mas cu a postula nan mes pa presidencia manera e pastoor Javier Bertucci ken ya caba tabata candidato na 2018 y a keda den e di tres luga, ademas di ex-alcaldenan Claudio Fermin, Daniel Ceballos, Antonio Ecarri, entre otro.