Desde cu pandemia di Covid-19 a haci presencia na nivel mundial a bin dilanti un posibel solucion pa disminui su propagacion, e vacuna. Awor henter mundo ta confronta grupo di personanan cu ta opone pa vacunacion y Aruba no ta scapa di esey.
Di e grupo aki por destaca cu nan ta nenga y rechasa e vacunacion contra Covid-19 pa diferente motibonan, pa algun di nan informacion cientifico no tin balor y hasta nan ta kere den teorianan di conspiracion basa den un fuente di conocemento scondi.
Asina mes, ayera diadomingo por a mira un grupo chikito di personanan cu borchinan expresando nan opinion contra vacuna cu a para dilanti hotel Marriot, hopi cerca di e localidad na unda e Vacunathon cu a wordo organisa pa gobierno tabata tumando luga.
Pa cu esaki, reportero di Bon Dia Aruba a acerca na e personanan aki pa haya sa e motibo pakico nan a dicidi di haci un manifestacion pacifico den contra di vacunacion pa Covid-19.
Un di e personanan cu tabata na e luga di nomber Keneth Lerdom a splica cu e obhetivo di su presencia tabata pa duna un mensahe: “No Vacuna”, su opinion tin di haber manera el a sigura, “cu cuater aña pasa nos minister presidente a campaña cu hende humano ta central, awor cuater aña despues e ta buscando un vacuna pa haci daño na su mesun pueblo”.
Tambe, el a declara cu “nos tur sa e peliger den e vacuna, si bo bay riba e website di CDC y e diferente luga cu ta di Merca bo ta wak cuanto hende cu datonan a muri, nos ta papiando di 100 miles di hende cu a muri y loke nos ta haciendo akinan ta pa informa nos hende, ta bo derecho y bo ta haci loke bo kier pero bo no por bisa cu bo no sa” el a manifesta.
Lerdom cu tabata forma parti di un grupo chikito di cerca di dies persona a menciona cu aunke nan tabata tiki nan tambe ta conta y e vacuna ta bay ta decision di cada ken “no ta decision di AHATA, ni bo doño di trabou por obliga bo pa tuma e vacuna, si ta bay asina leu cu gobierno mes ta sostene nan, den un situacion asina aki, nos mester protesta”, el a finalisa.
