ORANJESTAD – Gerente general di Barceló hotel, Samuel Johnson a laga sa cu un inversion miyonario a wordo haci pa un renobacion den nan instalacionnan.
Na aña 2016, e grupo Barceló a drenta maneha e hotel y a cuminsa bin cu algun cambio pa eleva y mehora nan servicio. Sr. Johnson a considera relevante pa informa nos pueblo, pero tambe nan clientenan cu e grupo Barceló a cumpra e dos empresa aki , esta Allegro y Occidental. “Nan ta parti di nos marca”, e di.
El a splica cu denter di e marca Barcelo, tanto Allegro como Occidental, nan ta marca ‘un poco mas baho.’ Nan a dicidi di realisa un renobacion cu un inversion di mas cu 12 miyon dollar. Nan a bin cu full un renobacion di nan cambernan, areanan publico, lobby y entrada di e hotel.
Nan lo sigui bon cu plannan pa sigui ofrece un bon servicio. Sinembargo mirando cu nan a bin cu e inversion grandi aki, nan kier recupera parti di nan inversion, pa asina premira con nan lo sigui crece y mehora nan servicio.
Pa tal motibo tambe e proceso di negociacion di un contracto colectivo nobo a tuma un periodo largo casi 8 luna. pero finalmente e CAO a wordo firma diahuebs ultimo cu sindicato FTA cu ta representa e trahadonan di e hotel.
Segun sr. Johnson nan a cana e caminda largo aki cu e interes cu tur dos partido lo por resulta beneficia cu e CAO nobo. El a bisa cu pa grupo Barceló, semper nan ta pone den prome luga nan recurso humano y e forsa laboral, ya cu nan ta e prome recurso cu nan ta conta cu ne y nan ta hopi importante pa nan.
