Den fin di siman, grupo Ban Lanta y Planta Aruba a ofrece un conferencia di prensa pa trece dilanti un campaña di conscientisacion tocante plantamento di mata na Aruba y cu e accion aki, nan ta haci un yamada pa comunidad por colabora y asina duna un tiki mas pa naturalesa di e isla.

Susana Maduro, miembro di e grupo, a anuncia cu e campaña a cuminsa pa via di Ewald Biemans, kende a publica un post riba Facebook tocante esaki. Cada siman hende a demostra interes pa e post y asina e iniciativa a hala atencion di un grupo di hende.

Pa logra e meta, Maduro a splica cu esey ta e caminda cu nan kier bay pa enrikece idea y motiva e publico pa cuminsa planta mata, cuid’e y laga bira grandi, pa despues e por duna frescura. Manera e mes a comenta, plantamento tin varios beneficio, manera duna sombra, duna frescura, ta un habitat pa parhanan y otro fauna, ta cultiva e tera, ta duna oxigeno pa hende por hala rosea, embeyece e paisahenan y ademas ta bon pa medio ambiente.

Di mesun manera, Maduro a bisa cu nan a invita e expertonan di tanto Santa Rosa como Departamento di Naturalesa y Medio Ambiente y otro persona cu experticio pa forma parti di un grupo cu ta bay traha pa motiva y inspira otro pa planta mata y palonan na Aruba.

El a menciona cu e campaña aki a inicia riba pagina di Facebook di Ban Lanta y Planta e luna aki y ta culmina dia 30 di november. Nan a dicidi di tuma accion pa invita tur hende cu ta biba riba e isla pa cuminsa planta mata, pa Aruba por haya mas vegetacion, sombra y tur otro beneficionan cu mata ta brinda. E intencion no ta pa e keda na un accion y nada mas, e ta un idea pa sigui y curasha otronan pa planta mas mata pa Aruba y mundo.

Di mesun manera, Maduro a indica cu tambe tin director di scol publico, Nora Eleonora, kende nan a invita pa participa cu e movemento aki, na unda un total di 10 scol publico ta bay participa.

“Ban sigui traha cu e meta pa Aruba haya un vegetacion bek, ban cultiva Aruba” Maduro a manifesta.

Freddy Vargas, kende tambe ta miembro di e grupo, a expresa cu loke nan kier ta pa tur famia join cu nan. Asina mes el a sigura cu e manera mas efectivo pa nan yega na e meta y pa tin mas impacto riba Aruba ta pa tur famia motiva y curasha pa por planta sikiera un mata of palo na cas.

E reto aki, Vargas a bisa cu hende tin cu graba un video ora ta planta un mata y cu esaki ta participa pa gana diferente premio di parti di sponsornan di e proyecto.

Den e conferencia di prensa tambe tabata presente minister di Enseñansa, Ciencia y Desaroyo Sostenibel, Armando ‘Rudy’ Lampe y el a señala cu a yega e momento oportuno pa cuminsa mira ciudadanonan activo cu ta hayando sosten di parti di Gobierno di Aruba, pa asina hunto bay den bon direccion.

El a informa cu como Minister di Enseñansa, e ta hopi contento cu 10 scol publico lo participa den iniciativa aki, pa motibo cu ‘nos tin cu cuminsa cu e futuro generacion’. Pa complementa esaki, gobierno a lansa un Natuur en Milieu Educatie, cu no ta teoretico sino cu ta algo practico y cu ta pa muchanan cuminsa planta na scol y despues cosecha frutanan.

Tocante esaki, Lampe a bisa cu scolnan ta reaccionando cu hopi entusiasmo, ya varios peticion a drenta di otro scol pa participa den e campaña aki.

Diabierna pasa, e grupo Ban Lanta y Planta a cuminsa cu e accion aki na cura di hotel Bucuti Beach Resort como sponsor principal y prome ehempel den e sector hotelero cu ta cuminsa cu planta un mata di fruta.