Cinco persona a muri y mas di 50 a keda desplasa durante un atake di un grupo arma contra un poblacion na oeste di Colombia, presidente Juan Manuel Santos a confirma diadomingo.
“Mi ta condena e asesinato di cinco persona na Chocó. Mi a ordena e persecucion inmedianto di hende cu ta responsabel”, Santos a skirbi riba Twitter. Defensoria di pueblo a bisa den un comunicado cu e situacion a sucede diasabra, na momento cu un grupo di homber arma a drenta na localidad di San Juan, na departamento di Chocó, nan a asesina hende cu tabata biba eynan y a origina un desplasamento masal.
Segun reporte, e atake a tuma lugar na “comunidad afro di Carrá y a provoca desplasamento di 14 famia integra pa 52 persona (18 mucha y 34 adulto)”. Defensoria a bisa cu un menor cu tabata herida a ser traslada pa hospital Docordó na municipio principal di El Litoral de San Juan, na pacifico di Colombia. Defensor di pueblo di Colombia, Carlos Negret a haci un yamado na autoridad pa tuma medida y asina cuminsa un investigacion cu por permiti detene e grupo arma, cu a ataca hende civil y nan casnan cu arma di candela.
Den e region ta opera integrante di Ehercito di Liberacion Nacional y banda criminal. Na luna di maart, alto comisionado di Nacion Uni pa refugiado a mustra su preocupacion pa aumento di desplasamento cu a sucede na diferente lugar na Colombia.
