Ayera atardi, dos representante di e grupo Anti Covid Vaccine Aruba (ACVA) Zulaika Dirks y Max Arends a duna un declaracion pa medionan di comunicacion pa conta comunidad un tiki mas tocante nan ideanan y e grupo cu nan ta forma parti di dje.
El a cuminsa informa cu nan tin un grupo di Telegram, Facebook page y Whatsapp na unda nan ta comparti e mesun pensamento pa para pa derechonan humano.
Asina mes, a keda conoci cu e grupo a surgi door di mayornan cu tabatin preocupacion pa e situacion di pandemia y cu nan kier a busca un apoyo cu otro cu e mesun pensamento, di para riba derecho humano pa dicidi kico ta wordo haci cu nan curpa.
Dirks a bisa cu ultimamente nan ta mira cu mas presion ta keda poni riba hende pa haya e vacuna “pero hopi tiki ta keda bisa riba e banda di esunnan cu no kier tuma e vacuna”, nan ta indica cu nan a lanta y vocifera nan preocupacion ta pasobra nan ta mira cu den publicidad di vacunacion ta keda usa palabranan cu ta causando un desunion grandi entre famianan, amistadnan y coleganan na Aruba.
Otro ehempel cu nan a trece dilanti ta e menasa di doñonan di trabou cu si personanan no ta vacuna e persona ta perde nan trabou “esaki a yega asina leu cu tin chens hasta di perde bo seguro medico”, Arends a bisa.
E motibo pa e cual nan no kier vacuna ta pasobra nan ta confia mas den nan sistema immuun mes cu si nan ta haya Covid-19, nan ta mas miho protegi cu si nan ta bay vacuna “cu algo cu mi no sa ainda kico ta bay haci cu mi despues”, Dirks a sigura.
Nan a aclaria cu nan no ta contra ni un otro vacuna, ni contra hende cu ta scoge pa vacuna, “nos kier para pa esunnan cu ta den posicion precario cu nan mes no por vocifera door di menasa di companianan cu tin nan trahadonan bou presion pa vacuna”.
Pa mañan diadomingo nan ta organisando un actividad pa “uni e pueblo bao e nomber di derecho humano” cu personanan cu ta pro of contra vacuna cu tin e derecho di bisa si of no na unda cu nan lo haci un caminata pasivo cu lo cuminsa 4or na Plasa Betico Croes di Oranjestad y lo caba na Plasa Wilhemina.
