Grupo a pidi libertad di Roberto Hernandez, deteni pa Guarda Nos Costa

Ayera tardi un grupo di persona bistiendo T-shirt preto cu e leyenda: #Free Roberto a bay Bestuurskantoor pa haci un apelacion na minister di Husticia, Andin Bikker.

E apelacion aki tin di haci pa tene consideracion cu e caso di Roberto Hernandez kende ta un artista di tattoo cu a wordo gara pa Guarda Nos Costa. Actualmente e ta deteni y pendiente pa su eventual deportacion.

E grupo aki entre nan famia y amigonan supuestamente a bay pa haci entrega di un manifiesto na minister Bikker kende no a baha. Den e caso aki a prefera pa un representante cu tabata e dunado di trabao bay papia cu ne.

Ta asina cu nan no a keda satisfecho cu un declaracion cu e mandatario menciona a duna rond di e caso aki y cu nan no ta considera cu e ta completamente berdad. Nan ta argumenta cu Roberto Hernandez a cumpli cabalmente cu tur procedura exigi legalmente pa otorga un permiso na DIMAS.

El a cuminsa tramita su di shete permiso, y te hasta el a haya un conseho positivo for di DPL. Pero tur cos a wordo pega na DIMAS, ora cu el a cuminsa tramita su cambio di firma. Dor di e situacion di Covid-19 e procedura aki a tarda hopi.

Nan a exhibi tur e documentonan pa demostra cu Roberto a haci su best pa cumpli cu ley y evita di keda den un statuut sin permiso di trabao. Te hasta nan a bay corte pa busca un veredicto for di hues. Nan lo bin cu otro caso, ya cu hues a indica cu mester bin dilanti riba DIMAS su contestacion. Ya cu e instancia aki a dun’e prome un recibo di pago di su permiso, y despues a neng’e. Te ainda niun decision a cay for di corte

Segun declaracion duna, Roberto a conta cu mal suerte. Nan a bay mas leu y te hasta bisa cu e caso di detencion aki ta un sorto di represalia personal contra Roberto Hernandez kende a nenga di traha un tattoo na e yiu di un halto funcionario… Nan no a divulga nomber.

Ademas nan a condena e hecho cu director di Guarda Nos Costa a post potret den social media di e persona cu ta deteni cu no a comete un acto criminal, sin tene cuenta cu su derecho di privacidad. Nan ta haya cu henter e asuto aki ta keda den man di minister Bikker pa logra un solucion husto.