Celebracion di Pasco y di Fin di Aña ta hayando algun inconveniente relaciona cu salud di ciudadanonan na Aruba, cu di un manera straño, a cuminsa haya sintomanan di un griep masha pisa mes, cu hasta algun ta sigura ta trata di Covid.
Den e dianan aki por tende di hopi hende cu a y ta birando malo pa via di un griep cu ta afecta e persona casi den su totalidad, mirando cu e sintomanan ta bay for di dolor di cabes, dolor di garganta, tosamento, dolor di weso, verkoud, slijm, curpa kibra, entre otro.
Usuarionan riba rednan social ta bin indicando cu ta un griep cu ta “hopi fuerte y pisa”, “ta dal duro,” na unda ta recomenda pa cuminsa bisti mask y cuida nan mes un poco mas, mirando cu fin di aña ta den porta y sigur lo tin basta celebracion.
Centro di Control y Prevencion pa Malesa di Merca (CDC) ta indica cu for di 1 di october te 9 di december 2023 a registra 7.4 miyon contagio di griep na Merca, 80.000 hospitalisacion y 6.800 morto relaciona cu e malesa aki. Expertonan ta adverti cu e cifranan aki por sigui aumenta den proximo simannan.
Tradicionalmente, e temporada den cual casonan di griep ta aumenta ta december of januari, pero e aña aki a cuminsa na october.
E siguimento durante e temporada di griep ta basa den reportahe di hende cu sintomanan similar na esun di griep cu ta bay hospital of dokter di cas. Hopi hende cu griep no ta haci test, pa loke nan infeccion no por ta confirma den laboratorio; Covid y otro virus respiratorio por pone e panorama mas scur.
Tin diferente tipo di griep, y e version cu a propaga mas na Merca den e aña aki ta provocando un menor cantidad di hospitalisacion y morto entre hende grandi, cu ta e grupo cu ta presenta mas victima pa e malesa aki.
No ta keda otro pa recomenda na pueblo di Aruba en general pa cuida curpa den e dianan aki, mirando cu e griep aki manera por a scucha di cierto ciudadanonan, e ta hopi fuerte.
