ORANJESTAD – Den un carta conhunto, manda na ministro encarga cu labor, e gremionan ATIA, AHATA y Camara di Comercio y industria (KvK) a expresa nan malestar cu e introduccion di un aumento di 3% di salario minimo entrante 1 di mei 2019, sin cu e gremionan a ser poni na altura na tempo, mientras cu tabatin espacio pa esey. Nan ta desaproba e manera di actua aki y ta bisa cu esaki ta mina e confiansa cu mester tin pa participa cu un bista habri na e dialogo tri partite.
E decreto (LB HAM) di 30 di april 2019 ta basa riba existencia di ‘circunstancia extraordinario’ pa por garantisa mantenimento di e poder di compra di e empleadonan cu ta ganando un salario minimo. Sin embargo, den nan conseho di 25 di maart ultimo, Raad van Advies (cu mester duna conseho den e caso aki; red.) a duna como posicion, cu no tin caso di ‘circunstancia extraordinario’. E efecto di e ‘crisisheffing’ di gobierno ta algo cu a ser atendi caba den e calculacion di e aumento di inflacion y e compensacion cu lo a duna pa esaki, si a aplica e ley na manera regular. Ademas e gremionan ta constata cu tabatin caba un cierto compensacion cu gobierno a duna adaptando e sumanan di e ‘reparatietoeslag’.
E gremionan ta lamenta cu no a tuma e conseho di Raad van Advies na cuenta. Tambe nan ta lamenta cu nan miembronan (y companianan registra, den caso di KvK; red.) a keda sorprendi cu e aumento abrupto aki, loke segun e gremionan ta conduci na adaptacion no periodico di administracion di salario, adaptacion di presupuesto, budget, oferta y, si ainda ta posible, adaptacion di contrato, cu tur e extra tempo, molester y gasto di esaki. Finalmente e gremionan ta expresa nan desaprobacion pa e manera cu a introduci e cambio aki, cu no ta mustra cu a tene debido cuenta cu interesnan di comercio y industria.
E carta tabata firma pa Michelle de Groot, director ATIA, Tisa LaSorte, CEO y director di AHATA, y Kawish Misier, presidente di Camara di Comercio y Industria.
