Gremionan Comercial, AHATA, CUA, y ATIA, a manda carta siman pasa pa Camara di Comercio (KvK) y Gobierno di Aruba como rectificacion cu e organisacion di registracion no ta representante oficial di sector priva ni ta un organisacion oficial di dunador di trabao.
Segun definicion di ILO (International Labour Organization) solamente gremio na cual companianan priva ta scoge di ta miembro, ta considera un gremio di dunador di trabao.
Aunke Camara di Comercio ta un Sui Generis, e ta un organisacion cu ta cay den sector publico y tin un responsabilidad oficial como consehero di gobierno y registracion di compania na Aruba pa gobierno.
Como tal, e gremionan comercial ta clarifica cu Gobierno ni comunidad por considera Camara di Comercio como un instancia cu tin derecho pa ta voz di dunador di trabao den sector priva.
