Un di e aspectonan mas importante di e acuerdo firma entre Pais Aruba y Citgo PetroleumCorporation ta cu e refineria na San Nicolas ta bay opera uzando gas natural como fuente energetico. Compara cu loke e tabata uza anteriormente, entre otro ‘Heavy Fuel Oil’, e ta un sistema cu ta bay reduci e cantidad di emisionnan dañino pa medio ambiente por lo menos na mita. Mas cu claro cu ningun refineria por ta 100% ‘berde’, pero e acuerdo aki ta reduci e posibel daño na nos medio ambiente grandemente. Banda di e reduccion cu gas natural ta ofrece, ta incorpora un sistema pa captura carbon (Carbon Capture) basa riba algen. E alganan ta consumi gran parti di e CO2 cu e planta ta emiti y for di e alganan por produci un cantidad di grandi productonan pa uza den otro industrianan cu por exporta. Entre otro, Unilever, un compania transnacional, ta hopi interesa pa haci uzo di e produccion di e planta aki.
Presidente di ATIA tabata un di e representantenan di gremionan comercial cu a haya un presentacion relaciona cu e acuerdo pa habri e refineria. Michel Henriquez a bisa cu e ta masha positivo despues di e informacionnan suministra, pero tambe cu preguntanan a keda contesta pa Ministernan Mike Eman, Mike de Meza, Paul Croes y representantenan di e Team Negociado cu a traha riba e acuerdo cu Citgo Petroleum Corporation.
Referiendo riba e parti di e splicacion cu a haya encuanto di gas natural, Henriquez a splica cu nan a haya confirmacion cu e planta petrolero ta bay opera for di prome dia haciendo uzo di Gas Natural. E trabounan pa rehabilita e refineria y cuminsa cu e infrastructura pa transporta gas natural ta pasa di un manera paralelo. “Nan ta bezig cu esey awo, pero mi ta kere cu tur esey ta cosnan positivo. Pasobra un refineria nunca ta bay ta 100% ‘green’, pero e proyectonan cu ta bay tin rond di dje cu a wordo presenta y splica, ta mustra si cu e lo ta un ehempel di con e por wordo haci pa futuro den otro refineria di e capacidad aki,” Henriquez a enfatisa.
Andres Hernandez di San Nicolas Bussines Association ta splica, cu aunke nan ta un organisacion comercial, pa falta di otro tipo di organisacionnan na San Nicolas, hopi biaha nan ta representa ciudadanonan comun y coriente tambe. Esey ta haci cu nan ta mas contento ainda cu e desaroyo aki di un planta petrolero na San Nicolas mucho mas limpi, specialmente compara cu loke a conoce den pasado. Sr. Hernandez ta splica cu na San Nicolas, dor dicustumber no tabata wak e bista di e tubonan of partinan mahos di e refineria. Pero el a enfatisa cu na San Nicolas, “nos tabata haya tur loke tabata e holonan y cualkier gasificacion cu e refineria a trece cu ne, ta nos a biba cu ne. Nos tin entendi cu awor, coriendo riba gas, e ta bay ta menos cu mita di loke nos ta bay haña, fuera di esey, tin e proyecto pa piki bek e CO2, asina ta nos ta bay tin hopi menos contaminacion den aire cu loke tabata existi anteriormente.”
Jim Hepple a bisa cu e iniciativa aki ta algo masha importante pa Aruba y tambe pa turismo riba su mes. El a splica cu el a haya masha importante cu a uza e palabra, rehabilitacion. “Rehabilita e refineria, trece e refineria den siglo21 y esey evidentemente ta bay yuda masha hopi mes relaciona cu e temanan di medio ambiente y tambe di emisionnan,” sr. Hepple a splica y a enfatisa cu, “for di perspectiva di sector turistico e ta hopi, hopi bon!”
Prome Minister di Aruba Mike Eman a pone e exigencianan medio-ambiental aki como parti di e acuerdo. Mirando e beneficionan economico cu apertura di un refineria ta significa pa Aruba, for di parti di Minister Eman, tabata importante tambe pa un reapertura no bin mes cos cu Aruba a conoce pa e ultimo 100 añanan. E meta tabata pa cambia e sistema pa uno mas moderno, cu beneficionan pa medio ambiente y calidad di bida di e poblacion di Aruba, pero particularmente di San Nicolas.
