Gremio por a trece sugerencia pa medio stakeholder meeting Minister Ruiz-Maduro: Toma di decision ta concerni Gobierno

Bon Dia Aruba a referi na Minister di Finanzas, Economia y Cultura, Xiomara Maduro –previo na e tratamento di presupuesto complementario – cu e gremionan comercial kier participacion pa atende a asunto di finanzas publico. E mandatario a bisa cu gobierno a duna e gremionan participacion pa medio di e stakeholder meeting. Den dje e gremionan a trece aden locual tabata nan sugerencianan. Pero e ta haya cu tin biaha e hendenan ta kere cu participa ta toma di decision, mientras cu e toma di decision ta concerni gobierno.

Mientras cu participacion ta e forma cu nan por tende sugerencia, el a bisa. Den e caso aki gobierno tin mas factor cu tin cu wak, prome cu ta tuma cualkier decision, pero logicamente nan ta tene consideracion cu nan sugerencia. “Pero ta yega un proceso cu bo tin cu tuma un decision y sigui bay pa implementacion”, segun Ruiz-Maduro.

Participacion y consideracion.
Segun e mandatario na september ultimo nan tabatin un stakeholder meeting, caminda gobierno tabatin consideracion riba loke e gremionan a trece dilanti, entre nan e asunto di sugar tax, royalties y roomtax. Asina el a reacciona na e reclamo cu a bin for di e gremionan comercial di e sector priva riba falta di comunicacion y participacion riba implementacion di e reforma fiscal.

Ruiz-Maduro a referi specificamente na e parti di royalties, caminda tin hotelnan cu ta opera riba nos isla y cu ta manda hopi placa afo, caminda gobierno por haya un parti di esey. Pero tampoco e sector aki no tabata kier.

Esaki a haci -segun e mandatario- cu nan mester busca otro alternativa pa yega na e entrada necesario pa atende cu asunto presupuestario di pais Aruba. Tambe el a agrega cu ora nan mester tuma decision, e no mester ta pa un sector so. Ya caba el a delanta na e matutino aki cu cambionan cu a wordo introduci den e reforma fiscal. Pero el a splica cu nan ta cambionan cu ta ‘begunstig’, kiermen cu bo tin un beneficio cune. “E no ta algo cu ta perhudica bo, pero e ta yuda bo”, el a bisa.

Aunke, segun e mandatario, como gobierno nan ta purba mas hopi cu ta posibel tene consideracion riba tur cos cu ta sugerencianan pa haci e tipo di cambionan aki. Pero el a agrega cu gobierno no por pa cada cos bay bek pa puntra e gremionan. E ta haya cu cada bes cu nan ta habri pa e parti ey, mas deseo ta bin acerca y nunca gobierno no por tuma decision.

E ta lamenta cu tin tardansa pa bin na cierto decision debi cu gobierno tabatin consideracion pa e sugerencianan cu e sector priva a trece dilanti, loke ta pone cu e proceso di decision tambe ta tarda. Consecutivamente esaki ta tarda e proceso di legislacion, caminda un ta bay mas lihe cu otro debi cu e tin cu pasa den diferente organo, etc.

“Bo tin cu duna respet na cada un organo pa su tempo pa dicidi, y tempo ta bay laga nos,” el a expresa. Segun Ruiz-Maduro e tipo di tardansa y falta di comunicacion cu otro y cu gremio ta cuestiona, tin mas di haber cu e tipo di factor expresa ariba, cu cualkier mala fe di parti di gobierno.