Minister Alex Schwengle a reacciona riba gremio di catochero, ya cu segun e mandatario nan no ta dunando nan contribucion na deporte di Aruba manera e fundacion Lotto pa Deporte si ta bin haciendo debidamente pa engrandece e desaroyo di deporte riba nos isla.

Sr. Schwengle a bisa cu basa cu investigacion internacional, tur e loterianan ta duna por lo menos 35% di e total di nan entrada pa un bon causa, entre nan deporte. A base di e acuerdo logra cu e compania Canades encarga cu Lotto pa Deporte, nan a logra un aporte di un 20% di nan entrada destina pa deporte. Esaki ta e cifra cu tambe nan ta pidi e gremio di catochi pa aporta na deporte.

E mandatario a laga sa cu esaki ta e miho convenio cu nan a yega cu Canadian Bank Note Company Limited y e ta contento cu e deal aki cu tin riba mesa. E mandatario tabata claro di bisa cu si esaki ta posibel pa Lotto pa Deporte, tambe esaki mester ta posibel y valido pa e gremio di catochi. “Asina e mester ta. Esey ta mi opinion y mi no ta kita mi opinion ni doblega tampoco.”

Si catochi ta haya cu 20% ta hopi halto y no ta alcansabel pa nan, e ora e mandatario ta haya cu ta bon pa nan habri nan bukinan pa nan tira un bista pa wak si den berdad e no ta realisabel. Aporte pa deporte y ley, e ta sigura cu e cifra di 20% no ta uno inventa sino cu esaki ta a base di estudio. Ademas e cifra calcula y cu ta existi mundialmente ta un 36%. Pero den e caso aki, gobierno di Aruba ta realisa cu e mercado di Aruba ta chikito. Si e catocheronan no por paga esey pasobra nan ta bay failliet, “mustra mi bo cifranan”, el a bisa. Di e forma aki nan por negosha un cifra mas abou. Mientras e calculacion cu gobierno ta maneha ta entre 20 pa 30 miyon florin cu e benta di catochi ta produci pa aña. E acuerdo di un 20% cu Canadian Bank Note Company Limited a wordo logra ora cu nan a bay Canada, unda e compania a habri tur nan bukinan. Considerando cu esaki ta informacion priva di e compania, nan no ta publica nan. E mandatario ta spera e mesun actitud di e gremio di catochero. “Mi ta kere cu un 20% ta un bon pida di e bolo pa deporte”. E ta kere cu nan por exigi e cifra aki pa catochi.

Sr. Schwengle a referi na e Ley di Loteria Arubano cu ta den parlamento caba, cu ta bay regarda tur sorteo, lotto y te hasta casino. E ta un instrumento pa parlamento y gobierno tin e “poder den nan man” pa cambia e ordenansa gubernamental aki. E ley aki ta bisa cu tur hende envolvi den e negoshi aki tanto catochi y lotto- por paga nan contribucion of aporte pa yuda deporte. Minister Schwengle a bisa cu e ley aki no ta warda den lachi, pero nan no a bin cla cu esaki ainda debi na e discusion cu a surgi cu e gremio di e catocheronan.

E ley aki ta brinda e gremio aki pa sigui bende catochi so pero dunando nan debido contribucion na deporte. E bendedo di catochi si lo por bende otro lotto pero solamente esun cu ta hancra den ley. Segun ley aki na Aruba, un lotto so legalmente tin, esta Lotto pa Deporte. Mientras cu e benta di otro sorto di lotto ta ilegal na Aruba. E gremio di catochero a yega di reuni cu minister di Financia caba. E no sa si nan a yega di sinta cu otro ministernan. Sr. Schwengle a declara cu e no a sinta cu e catocheronan, te ora cu nan ta dispuesto pa habri nan bukinan. E ta argumenta cu na momento cu nan ta habri nan bukinan esaki ta refleha transparencia y cu bo ta biba cu ley. Tanten cu nan no ta haci esey, e no ta sinta cu niun hende di catochi.