E malcontento ta pa motibo cu diamars ultimo a tuma luga un reunion entre minister di Husticia Rocco Tjon conhuntamente cu diferente departamento relaciona cu control di frontera, na unda cu no a extende e invitacion na Sindicato di Aduana.

Edward Maduro, presidente di sindicato, a informa na Bon Dia Aruba cu despues di tuma nota di esaki, miembronan di sindicato a acerca na nan cu e disgusto, cu segun el a sigura, “Aduana ta wordo laga afo di un ekipo asina cu tin di haci cu e control na frontera, e cual ta algo hopi importante pa pais Aruba”.

Nan ta señala cu nan ta decepciona, pero no cu minister di Husticia, sino mas bien den e maneho di director di Aduana y tambe di minister di Finanzas, cu ta atende cu asuntonan di Aduana.

Maduro a sigura cu “pa añanan largo nan ta wak cu e negligencia y incapacidad di director di Aduana, cual maneho ta wordo aproba pa departamento di Finanzas, ta un muestra cu nan no ta dunando un importancia. Y e ta algo cu semper a nos ta boga pa nan como sindicato,” pa Aduana wordo inclui y duna su luga manera merece den comunidad. Pa motibo cu na tur luga di mundo Aduana ta e prome yama pa atende riba seguridad di frontera.

Tambe, el a comenta cu minister di Husticia kisas no tabata sa con e situacion ta hinca den otro. Pero manera Maduro a menciona, e ta kere cu ta na su luga pa nan vocifera e mal contento di nan miembronan, pa motibo cu e negligencia aki ta pone cu e demotivacion di trahadonan di Aduana ta keda ainda.

“Tur hende sa cu nos ta den un situacion no saludable cu e director y tampoco cu e minister, pero sigur esaki no ta yuda. Na final di dia e miembro di Cuerpo di Aduana ta esun cu ta bay trabao mas demotiva, fada y sigur nos kier busca un manera pa drecha esaki, prome cu bira mas pio ainda”, Maduro a enfatisa.

Ta conoci cu Sindicato di Aduana a señala esaki na prome minister, Evelyn Wever-Croes tempo cu gobierno tabata demisionario. Igualmente tempo cu tabata como formado unda cu nan hasta a bisa cu kisas lo ta bon pa bin cu un cambio pa presiona e mandatarionan pa e maneho di Cuerpo di Aduana. “Pasobra ya caba nos ta den un situacion dificil, nos tin mas cu dos aña sin reuni cu minister di Finanzas” cu den caso aki ta Xiomara Maduro. Tambe nan a tuma nota cu den proceso di formacion di gobierno practicamente tur sindicato a haya audiencia cu e ministernan di diferente departamentonan pero Aduana a keda na un banda.

Maduro a señala cu e tema aki di frontera ta uno cu sindicato semper a boga pa bin back, pa motibo cu antes e tabata wordo haci unda cu e cooperacion di ex-minister di Finanzas, Angel Bermudez a logra cu Cuerpo di Aduana a traha hunto cu polis. Y for di e tempo ey nan ta boga pa bin cu reunionnan of reglanan riba mesa pas asina nan contribui.

“Aruba ta rondona door di lama y ta practicamente imposibel pa bo cera e frontera hermeticamente, pero mi ta kere mas pa nos traha hunto pa e causa comun,” Maduro a bisa.

El a trece dilanti cu Cuerpo di Aduana y miembronan di sindicato kier traha y nan kier aporta mas ainda, nan ta espera cu pronto lo por trece esaki cerca di minister di Husticia y prome minister pa motibo cu e tambe ta na haltura di tur e situacion segun Maduro a comenta y tambe a informa cu “nos ta bay purba di acerk’e pa wak unda e por duna nos un man of duna e Cuerpo di Aduana e balor cu e merece”.

Di mesun manera, el a indica cu nan a tene algun reunion cu e minister di Husticia saliente Andin Bikker pa motibo cu nan tin mas puntonan cu a pesar cu Aduana ta cay bao minister di Finansa, tin algun punto cu ta resorta y cu mester wordo atendi pa minister di Husticia.

Den un di e reunionnan cu Bikker, Maduro a compronde cu el a informa minister actual Rocco Tjon riba e puntonan aki y nan lo bay acerk’e pa un reunion pa asina busca solucion pa e puntonan cu nan kier clarifica.