Recientemente un miembro di Parlamento a tuma e iniciativa y a entrega e propuesta di ley importante cu ta rekeri pa e impuestonan BBO/BAZV y BAVP keda aparece riba e recibonan. Aki ta unda cu gremionan comercial ta mustra nan apoyo pa e propuesta di ley di parlamentario Daphne Lejuez (MEP). Esaki e gremio comercial, en conhunto, a comunica na prensa pa medio di un comunicado emiti ayera diabierna.
E gremionan comercial ta haya importante cu tin transparencia den e prijsnan y ta admira e iniciativa di e parlamentario aki pa tuma e paso aki. Di e forma aki tambe ta mustra comprension no solamente cu sector priva pero cu pueblo tambe.
E comerciante semper a bisa claramente cu ta importante pa e impuesto wordo menciona riba e recibo y pa tin transparencia pa tur hende por wak cuanto ta cobra pa omzet di servicio y cuanto pa producto. Kitando e impuestonan aki for di e recibo ta trece desconfiansa y ta haci cu Aruba lo mustra di ta bira mas caro. Tampoco por sa definitivamente cuanto a hisa e prijs pa cubri gasto di BBO/BAZV y BAVP. E impacto ta afecta turismo y imagen di Aruba y lo crea e impresion cu costo di bida na Aruba ta mas halto. Tanto local como turista ta indica esaki caba.
Pa tal motibo gremionan representando comerciante ta apoya e esfuerso pa draai bek e decision tuma den parlamento na december pa kita e BBO for di recibo y pone den prijs. E gremionan cu ta para tras e iniciativa di propuesta di ley di e miembro di parlamento ta: AGA, AHATA, AJA, ATSA, y KvK.
