Fundado di Stichting Dijkhoff Papiamento Cursussen a duna un entrevista special na Bon Dia Aruba pa asina por splica kico e fundacion aki ta haci, ya cu recientemente a cumpli 10 aña di su fundacion.

Gregor Dijkhoff presidente y yiu di e linguista y autor difunto di e diccionario Nederlands-Papiaments y Papiaments-Nederlands, Mario Dijkhoff, a expresa cu e fundacion a ser funda e dia 6 di maart di aña 2012 na Hulanda, unda e ta biba.

El a menciona cu e obhetivo di e fundacion ta pa organisa cursonan di Papiamento pa tur hende cu no ta papia e idioma y tambe duna informacion cultural di Aruba, Corsou y Boneiro.

El a expresa cu na cuminsamento, el a pasa den diferente situacionnan unda el a siña hopi y e no tabata sa mucho di Papiamento; pero door cu su tata tabata linguista y tabata experto den Papiamento na Aruba, el a siña hopi cos tocante gramatica cu e buki di su tata “Un pa Un” (Papiaments stap voor stap) y el a cuminsa duna les y tambe organisa cursonan di Papiamento.

Di esaki, el a conta cu su tata tambe a siñ’e con pa duna les. Den e temponan aya, manera Dijkhoff a bisa, el a duna un curso na Hulanda unda tabatin un grupo grandi di studiante, caminda su tata tabata bay na e luga y sinta patras pa wak con e tabata duna les na studiantenan adulto. Di e forma ey el a haya sa kico e mester a mehora y kico e tabatin bon, e miho manera con pa duna les.

Door cu su studiantenan tabata adulto, e mester a trata cu hende adulto, con por siña nan. Despues el a haci un opleiding di docente di idioma Aleman, unda cu el a duna les na varios scol na Hulanda. “Eynan mi a siña mas tocante dunamento di les, con pa prepara les, tur e teoria y practica pa traha cune y esey mi a siña durante e opleiding, unda mi por a profesionalisa mi cursonan di Papiamento”, el a expresa.

E bukinan Papiamento Un pa Un (Papiaments stap voor stap), Proverbio y Dicho di Aruba, Gramatica di Papiamento y Terminologia Gramatica – igual cu e bukinan Papiamento Step by Step y Papiamento Paso a Paso, cual recientemente Gregor y su ruman Maik a publica – ta disponibel tanto na Aruba como na Hulanda segun Dijkhoff a expresa. Tambe el a bisa cu aunke na Hulanda no tin hopi hende cu kier siña e idioma Papiamento, si tin algun persona cu ta bay biba na Aruba, Corsou of Boneiro.

Den siman e ta duna les dos pa tres biaha pa siman den oranan di anochi, na unda cu e ta dedica su dia na su trabao cu ta customer service specialist. Na Hulanda el a duna les pa entre otro Tweede Kamer der Staten-Generaal, Politie Zwolle y Groningen, DUO (Dienst Uitvoering Onderwijs), Hogeschool van Arnhem en Nijmegen, Hanzehogeschool Groningen, Berlitz Schools of Languages, varios otro compania y hopi persona cu ta emigra pa Aruba, Corsou of Boneiro.

E ta haya importante pa hende cu ta bin di afo y biba na Aruba pa siña papia Papiamento, “semper ta importante pa siña idioma”, el a sigura.

Aunke na Aruba tin algun persona cu a nace na Aruba y no ta skirbi nan mesun idioma di un bon manera, Dijkhoff a splica cu den ultimo añanan idioma Papiamento a wordo introduci na scolnan cu e vak di Papiamento, unda muchanan ta siña skirbi e idioma; algo cu pa Dijkhoff ta hopi importante, pa comunidad siña skirbi e idioma.

“Tur hende lo mester siña y skirbi Papiamento manera e mester ta, aunke e no ta facil. Si un hende cu no a siña na scol tin cu bay siñ’e den un curso di Papiamento manera ta wordo ofreci pa algun organisacion, esey tin un costo unda cu pa algun persona no ta posibel pa por paga pa esey”.

“Mi ta kere cu e necesidad no t’ey ainda, no tur hende ta bay haci nan best pa siña skirbi Papiamento drechi” el a sigura.

Papiamento a bira idioma oficial na Aruba for di aña 2003. Na 2018 el a wordo vastgelegd, loke ta nifica cu ta reciente cu Aruba tin un ortografia oficial y ainda ta falta hopi palabra cu mester agrega, cu no ta existi den e buki blauw, cu ta e “Vocabulario Ortografico di Papiamento”.

Dijkhoff a señala cu e fundacion ta enfoca mas tanto riba hende stranhero cu no ta papia Papiamento. Cursonan basico cu ta wordo ofreci pa hende cu no ta papia e idioma aki y cu nan kier siña papia.

Pa finalisa el a comenta cu no tin hopi otro fundacion manera Stichting Dijkhoff Papiamento Cursussen na Hulanda, unda ta existi un par so cu ta dedica na esaki, caminda e fundacion semper ta interesa pa colabora riba proyecto cu kier pa Papiamento bay padilanti. Ademas, el a sigura cu algun buki nobo lo wordo publica e aña cu ta bin.